—96—

JON MIRANDEri

Paris, 1953-I-7

        Adixkide kutun:

        Barda zure gutun iluna eskuetara zitzaidan. Ez da bat ere miresgarri zure egoera itun ori zure euskal-ekintzaren ziturik ikusten ez duzulako. Bainan ez duzu zertan etsi adiskide maite. Nik ere zuk bezalako beltzaldiak ugari ditut, ondo dakizunez. Bainan nere gogo akitua jasotzeari ekhin diot nekez badare. Gainera, ene adiskide, ez zaude izpidean zure euskal-ekintza antzu ta elkorra izan dala diozunean. Nere uste laburrean zure ekintza bikaina etekintsuena izan da euskal gogo eta letretan ere. Beste ekintza oro baino etekintsuago. Ez litzakit zail egingo nik esana sendoki progatzea. Ain zuzen, atzo artu nuen, zurearekin batean, Donostiko ene adiskide baten gutuna, zure izena eta euskal-lanak goi mailan jarririk. Beste alderdian ageri dan igikun zoragarria, euskal poesi egiatiari buruz, zuri dagokizu oso-osorik eta zure eraginari. Beaz, sursum corda, apaiz itzez esateko eta aurrera beti. Noiztanka ez ditugu gure lanen ondoreak esku-eskuan ikusten, bainan zurearenak eskuor daude, edonork ikusteko. Ez eskola berrikoak, Krutwig eta ingurukoek, ez eskola zaharrekoak, ez dute ainbeste euskal gogo zirikatu, zuk zure lan ederrekin bezala.

        Ikusia dukezu azken Euzko Deyan, zure lan ederra «Amillaitz» apaizarenakin batera ager erazi dudana. Orain arte ez dut erantzunik jaso, bainan laster baten batzu zirika etorriko diralakoan naukazu. Alare on aundia egingo du euskaldun txepelen artean zure artikulu jori eta jakintsuak. Ikusiko dute gure elerti auziaren egi betea eta bidenabar trabarik aundienak ere oartuko ditute. Gazteen artean on aundia egingo du liburu lizunetaz idatzi duzun lantxo orrek. Nai ba zenitu, igorriko dizkitzut Euzko Deyaren ieki batzu zure ezagunen artean barreia ditzazun. Esan ezadazu zenbat bear zenituken, eta igorri edo emango dizkitzut. Nere aldetik, zenbait igorri ditut barneko euskalzaleentzat, pozik artuko ditutelako. Aiek ere barreiatuko ditute beren artean. Beraz egiaren azia orrela zabaldu al izango dugu gure erri errukarrian barna.

        Berri on bat eman bearrean naukazu. Egun auetan iritxi da ona Parisa Venezuelatik etorrita, gazte aberats bat, euskalduna. Datorren Urrila artio Europa barna emango ditu ilebete guziak. Bere gain artu du gazte abertzale onek, euskal ikasbide berri bat egiteko ardura, eta egiteko ori Venezuelara itzuli baino len burutu bear du, ez bakarrik burutu baita ere publikatu liburua. Berak ez daki euskararik, bainan neri egotzi dit egiteko, ori gure artean antola dezagun Basik Inglis bezalako gramatikatxoa, irudiz apaindua, euskara ikasteko. Berak ekarri ditu ingeles eta espainolez egindako liburuak, aien ariora guk euskerazkoa antola dezagun. Zenbat diru kostako litzaken nere lana esan dit, bainan nik, deus ez dala izango erantzun diot. Naiago nukela erantzun diota, zure olerki liburutxoa argitaratuko baluke ordainez. «Emaidazu liburua eta neonek, nere kontura, Donostian edo Zarautzen irarriaziko dut» erantzun dit. Beraz badakizu. Ea lenbailen gertutzen duzun poema bilduma ori, irar dezagun.

        Igantez, Euskararen eguna. Badakizu mintzaldi labur bat egin bear dudala. Garrazki mintzatuko naiz. Naiago nuke jai ortara etorriko bazina, ondoren nerekin bazkalduko duzu bazkari polit bat. Nai al duzu adiskide. Jaia igantez 11 orenetan, Salle des Horticulteurs, 84 Rue de Grenelle (VII) Metro Bac´en duzu.

        Roberten berriak izan ditut, eta oraindik ez diot jardetsi gizajoari. Zuk literaturaz eskatu lana bretoindarrentzako, urhentua dizut, norbaitek prantsez txukunean ezarteko zai. Laister egingo dit. Leizaolari eskatu nion beste lantxoa, baiezkoa eman zidan, bainan oraindik ez du bukatu edo asi. Egingo dula nik uste.

        Urte berri-on eta gogo on ere dezazula urtea jarrai. Zure gurasoei ere bertze ainbertze biotzez opa diet.