—130—

JON MIRANDEri

Parisera

Guatemala, 1954-III-25

        Adiskide min:

        Ostera liluragarri baten ondoren, emen naukazu Guatemalako erri eder ontan. Ederra esan bearko, bada eguratsez beintzat, atseginenetakoa duzu. Nere zai arkitu nuen kai ondoan, Zaitegi adiskidea, itsaso barneko errego bat bezala, besaulki zabal batean legorrera jaso nindutenean. Zuk au ez duzu ulertuko, beaz onerat etorri bear, San Joseko porturat alegia.

        Txera ona egin zidan gure adiskideak, merezi nuen baino obeagoa. Eskerrak berari nere balisen goraberak laister atondu aal izan nituen eta ederki. Bainan, prantsez txatxuek, ene balisetarik batxo ontzian eraman zidaten Kaliforniara. Orra nundik, nere maleta aundiak nik baino are lur geiago ikusi dituen. Ez dakit noiz eskuetarako didaten, ain zuzen liburuz kuin-kuin dago aipatu maleta. Etorriko da, bestela Cie. Generale Trasantlatiquek ordaindu bearko dit.

        Aldaketa aundia, adiskide, ortik onakoa. Au ez da Paris, urrik eman ere! Or igaro zazpi urte luzeak ez ditut bereala aantziko, ez orixe. Euskalerria eta Europe zaharra, barneegi daramazkit ene biotzean.

        Alare asi gera zerbait egiten euskal alorrean. Ba zuen Zaitegik ia bi urte ezkeroz, ezin antola zezakean zenbaki bat, E.-G.rena alegia, dana naspildu ziotelako. Zenbaki ori antolatu dugu, 1952.eneko urtearen azkena izan dedin. Eraman dugu irarkolara berriz ere linotipiz jo dezaten. Zure bi olerki argitaratzen ditugu aipatu zenbakian, «Ortziren Ttunttuna», eta «Zakhur Hil bati». Emengo linotipist eta langileak oso astiroak dituzu, ez jakin, beaz, noiz argitara ilkiko den. Nerez alegin guztiak eginen ditu lenbailen izan dedin.

        Bertze zerbait. Zaitegi jaunak arrotz izkeretatik euskeratu olerkiak, izkera originala aldamenka dutela, argitara nai lituke idazti batean bilduta. Bainan ortarako olerkarien izkuntzetako textoak nai lituke. Bialduko al zenituke zuk egin itzulpenen textoak izkera jatorretan. Ar itzatzu engoitik, gure eskerrik oberenak.

        Egun auetan gure aldizkariaren zabalkunde aundi bat egingo dugu ludi biribileko euskaldunak inarrosteko. Erantzunik izango dugula uste dut. Baita ere E.-G.ren inguruan argitaldari bat egingo dugu, bospasei liburu urtean argitaratzeko. Oriek dira Zaitegiren asmoak eta jakina, nereak ere bai. Gure gizona, baikor dago eta euskelzaletasunez kuin-kuin. Lanpetuegi dago, eta nik zerbait lagunduko diot, bananatzen ez banaiz. Emengo eritasunik kaltegarriena, bananatzea duzu, ots kemenak gal eta bertoko biurtzea. Zartxoegi naiz ni ortarako, bainan gertakizun da.

        Berri ezin obeak jakin ditut emen gaindi argitara gai diren euskal liburuei buruz. Bizkaiko praile batek Euskal mila olerki onenak aurten argitaraziko ditu. Ementxe irakurri dut aipatu liburu orren itzaurrea, oso ederki idatzia, sakon eta luzea. Zure berri ere ematen du, esan bearrik ere ez.

        Leen bezin gartsuki jarraituko al duzu euskal arloan. Bial izkiguzu zure sorpenak, argitaraz ditzagun. Zer darabilkizu eskuartean?

        Goraintzi Krutwig eta Peillendarrei ikus baditzazu. Zure guraso maiteei ene atseginak. Besarka sendo bat ar ezazu adiskide.