—217—

JON MIRANDEri

Parisera

Caracas, 1963-II-11

        Adiskide mina:

        Pozkarioz bete ninduen zure gutun atseginak, naiz-ta bertzerik zuri iruditu, oinbeste berandutu baitut ene inardespena. Aspaldion alako ezintasun batek jota nabilkizu, ezertarako gogorik gabe, zanil eta inul erabat. Tropiku txatxu onek darizkin eritasun garait-ezinak or-nunbait eta ez jakin kankroaren aginkadak ala auntz-adarraren ukaldiak diren. Diranak dirala, eztira batere atseginak. Poztu naiz zure aita osasunez onik arkitzen dala jakitean. Luzez iraungo al du ontarsun orretan. Aipatzen dituzun diru-kontuak eztira deus ere osasunaren eretzean naizta laguntasun uka-ezina eman. Bainan, zorionez, zuk eta nik baditugu aberastasunek eman ez ditzaketen poz iturriak barne girotik datozkiguna, diharuz goroztatu biotz zikoitzetan inola ere sor ez ditezken atseginak. Eta ez nioa filosofi sakonetan murgiltzera bidekatu ez naiten beldurrez.

        Lengo batean irri-aldizkari pila bat igorri nion Igelaren zuzendariari, Peilleni alegia. Itsas-legorrez dioazkio eta eztakit noiz eskuratu al izango dituen. Bainan nik ez dut oraindik ukan aspaldiko gure Txominen berririk, naiz ta zuk aren gutunak iragarri zure letretan. Galdetu ezaiozu eneki samurtuta ote dagoenez. Eganen irakurri ditut zuen idaz-lan ederrak, eztitan irakurri ere. Peillenek idatzi Gala balletaren kritika polita eta berria benetan. Grekoz gala txuri diteke, bainan Gala Daliren emaztearen izena da eta ez dakit aren emaztearekin zer-ikusirik izango ote duen ballet orrek. Eta zuk Aginagari eman diozun erantzupenak eztu deus galtzekorik eta eztut uste Aginaga ori berriz asiko denik zurekin burrukan. Ikusia dago gure artean bakoitzak defenditu bear duela bere baratza, eta zuk ezin obeki defenditu duzu. Beste norbaitek ezin zezakean ain ondo zure aldezpena egin. Eta ori betiko kontua izan da, gure artean eta beste askoren artean: antxinakoa da cicero pro domo sua itzaldi sonatua. Ark ere ber-berak jo bear izan zuen bere buruaren alde. Eta bukatzeko, zorionak bi-bioi egin dituzuen idaz-lan ederren alderako.

        Igelarik eztut jaso Maiatzeko zenbakiak ezkero. Esaiozu Peilleni nere oraingo zuzenbidera bialtzeko Edificio Valdianara alegia, bestela galtzeko arriskuan jarriko luke igel maitea, eta nik eztut olakorik nai. Asi nintzan zerbait idazten zuen aldizkarirako, bainan ezin izan dut gauz onik burutu. Oso antzu arkitzen ditut nere burmuinak, batez ere alako aldizkari zorrotz baterako idazteko. Eta laister arpide-saria ere ordaindu bear dizuet. Esaidazue noiz bete bear dudan egiteko ori.

        Zaitegi berriz ere Guatemalan arkitzen da aspalditik. Euzko-Gogoa betiko agortu zen, eta eztut uste berriz asiko denik lan orretan. Arrezkero liburu bi argitaratu ditu gure apaizak Platoneneko Atarian eta Berriz ere goldaketan, bertso liburutoa. Platonena eztut ikusi oraindik, bertsu liburuxka bai, eta gogorxko arkitu ditut ango neurtitzak. Zorretan nago apaiz orrekin, eta eztakit noiz idatziko diotan berriz ere. Ni emen ari naiz zerbait egin naiez. Baditut eskuartean iruzpalau lan, eta eztut oraindik esateko gauzarik egin. Emen eztut girorik arkitzen nere euskal-lanetarako ez etxean ezta etxetik kanpora. Eztakizu ondo nola deitoratzen ditudan Parisko egun eder aiek. Zuen artean nai nuke nere euskal gogoa berriz ere indartzeko.

        Anartean, emengo giza-kaxkar zenbait bildu dira Alderdi berri bat egiteko, Jeltzale alderdiaren ariora. Neri ere otsegin zidaten, bainan euskerarik ezertxo ere nai ez duten alderdiekin ez nuela parterik nai erantzun nien, eta an gelditu etxean. Ederki diozu zure eskutitzean «salbatzaile» geiegi ere baditutela euskerak eta Euskalerriak, baina ikusten ez salbaziorik.

        Etzaitut areago gogaitu nai eta ementxe noa bukatzera. Ar itzatzu ene agurrik beroenak.