—158—

JOKIN ZAITEGIri

Miarritzera

Caracas, 1957-I-19

        Adiskide maitea:

        Euskal-idazle etxe berri ortatik zuzendu zenidan zure lenengo gutuna pozez gainezka irakurri nizun. Erantzun lasterragorik bear zukean, baina, betikoa... betarik ez eta gogorik ere ez. Aurtengo lendabiziko idazkia zuri dioakizu beintzat, eta ortik atera dezakezu zer nola nabilen besteekiko, nagi ta atzera oso. Barkatu beraz, luzapen bidegabeko au.

        Atseginak, zere bide malkar ortan beaztopak garaitzen ari zeralako, «sasi guztien azpitik eta mendi guzien gainetik», izan ere antxinako sorginena baino askoz latzagoa baita euskeraren alderako artu duzun bide ori. Mingarria ordea, oraindik Jaka bildu ez izatea. Bion artean lan ederra burutuko zenuten noski... Nork daki ordea, oraindik ez ote zaizun batuko? Baliteke. Nik beintzat, poz andia artuko nuke ori ala gertatuko balitz. Jainkoak ai-letsa! Nik oraindik ezin nezake ingurunerik egin or gaindi; ez sosik, ez pozik... Jo ta ke ari naiz lanean, nere irabaziak ordea ez didate orrako biderik laketzen, oraindik beintzat. Nork daki gerotxoago ibilaldi bat egitea ere?

        Ori baino saminagorik gertatzen zait... Erri ontan ezin da ezertxo idatzi. Nere goizetik gaberako lanak, zearo akiturik uzten nau ezertarako ere adore gabe... Idazle bati gerta lekikeon ezbearrik andiena. Guatemalan, ez nuen inoiz olako ezaldirik ezagutu. Orra zergatik ezertxo ere ez dizudan bialdu Euzko-Gogoa begikorako. Ez dakit Mantxiren Gure Patroi Aundia-ren iritzirik argitara ote duzun; emen daukat bat, aspaldi ontan idatzi dudan idaz-lan bakarra. Itzaldi batzu egin ditut emengo euskal-etxean... Mikel Deunez, Euskeraren Egunez, eta azkenekoz urrengo azalburupean «Gudu-ondoko gazteak eta Euskera». Euskeraren eguneko itzaldia pozik entzun zidaten, ori gero ale ederrak bota nizkiela..., idatzita eraman nun, baina paperak alde batera utzita, biotzaren eraginera ibili nintzan, eta orrela jendea askoz ere adiago egon zitzaidan. Azkeneko itzaldian, zure lan ederrak aizatu nitun batez ere euskal-idazleen etxearena eta gaztediak Euzko-Gogoan egin dun lana gure aberri izkera gaitu ta pizkortzeko, edozein adimen bideak barna erabiltzeko. Gogoz entzun zituten esanok, geienentzako zearo berriak. Ez dakit ondorerik ekarriko ote duen... Nik ezetz uste euskeraren inguruko emengo giroa zearo ustela baita. Egia garratzak oi dira, eta auxe bat.

        Emen dirua bil ditekela diozu gure asmoetarako... Baliteke. Nik inor gutxi ezagutzen dut euskotarren artean eta ez dut aleginik ere egiten ezagutzeko. Baina ondo dakit oso eutsiak dirala guztiak. Emen izan da Arantzazuko praile bat diru bilketa etorrita... ez dut uste ibilaldia ordaintzeko beste ere atera dunik... Baina sail ontan ondo jabetuta zaudela derizkiot, or egondako nere adiskide batek esanda, beraz ni ez nijoakizu ontaz luzezago itz egitera.

        Olariagak ez du jaso E.Gogoa-rik, eta zuri esateko diost. Ni bigarren zenbakiaren aiduru nago. Lengoa bezala, oparoa izango da nonbait ere. Orra papera akitu. Aitorkizunak irakurtzen ari naiz gogoz alajaina. Ar itzatzu adiskide, ene besarka gartsuenak. Euskera bedi beti gure goi-buru!