—5—

JOKIN ZAITEGIri

Guatemalara

Paris, 1947-IV-1

        Ene adiskide min:

        Bear bada idazki onen idazpurua irakurtzean zerbait arritu zera. Bai, ene adiskide, Ludi onek nai baino bira geiago ematen ditu ustekabean noranai iraizten gaitualarik. Ni ona iraitzi nau, toki egokira alabearrik.

        Nere lanak bide dirala, Francoren eskuetatik igesi bearrean arkitu naiz, aren morroiak etxeratu bai zitzaizkidan atxilotzeko asmoz. Bainan nik oraindik aztalak arinak izaki, aien sareetatik alde egin nun zorionez. Orra nundik eta nola emen arkitzen naizen errikatuta, adiskide pila batez inguraturik.

        Ain zuzen ere zure idazki atsegina Parisera eldu bezin laister eskuratu zitzaidan. Benetan pozgarriak zure berriak! Engoitik dakit Euzkadiren onez lanik asko ta garrantzitsuak egingo dituzula, orko Ikastetxe Nagusian baita bestela ere. Pozik emango nion Azkue Jaunari zure Bosch Gimpera-ren berri. Maiz mintzatu izan gera jaun jakintsu orretzaz.

        Ez dakit noiz izango dugun aberriratzeko giro. Gaurko izparkariak diotenez, Francok bere aginterria bakalderri biurtu omen du, bera buru, ordea. Ageri danez erorbidetik igesi naiez dabil, ta inun diran txorakeriak asmatzen ari da. Ez dut uste ordea, joko zikin oietan zurkaitzik arkituko duanik. Bitarten ez dakit norabearrik arkituko naizen. Baezpada ere neretzako tokiren bat bilakatu ezadazu bizi zeran lurralde eder oiek barna. Edozein lanetarako gertu naukazu. Bearko, bestela Euzkadiren morroitza bear baino areago luzatzen bada gorriak ikusi bearko ditudala uste det.

        Lengo baten Montzon jaunarekin itz aspertu bat egin nun. Gure jarduna, eskeltzaleei dagokionez, euskeratzaz izan zan. Zure lanak ere aotan erabili genitun. Montzon arrituta daukazu zure euskeraren aberastasunaz. Zu bezelakorik gutxi, esan zidan. Bigarren olerki-pila Biarritzen egun abetan argitaratuko omen du. Irar-lanean ari dira beintzat. Emengo abertzaleak ere euskelzaletasunez kuin-kuin dituzu. Kukuak onez jotzen badigu, euskeraren loratze zoragarria ikusiko dugula etsi-etsita naukazu. Zertarako bestela euskera bageko Euzkadi?

        Beraz Jokin maite, biali alik eta laisterren zure idaztiak irakur eta zure izkuntza ederra gozatu dezadan. Sal-bideak ere ikusiko ditut, euskeltzale aunitzek zure lanak ikus-minez daudeta. Euzkadin ere nere adiskide min bati, zuk diozun bezala saldu ote ditezken galdetuko diot. Erantzuna igorriko dizut.

        Ene adiskide Olabide jauna ta aren arrebak or nunbait ikusteko eretitik baduzu, mila goraintzi niketz.

        Zuk ere nere agurrik beroena jaso ezazu. Beti ere zure adiskide.

        * Emengo zuzenbidera idatzi, otoi.