—107—

JOKIN ZAITEGIri

Guatemalara

Paris, 1953-VI-15

        Adiskide maite:

        Zure orrileko gutuna eskuartean daukat. Geroago Mirande jaunari ene bidez igortzen zeniona artu nuen. Bereala aren eskuetara el-arazi nuen. Atzo ain zuzen, idatzi zidan eta urrengo au esaten dit: «Zaitegiren eskuthitza jakingarria; erakhutsiko derautzut elkar-ikhustean: erantzun eginen deraukot lehen bai lehen, zure bitartez igortzeko». Beaz badakizu, laster aren jardespena elduko zaizu.

        Sabinen opaz idatzi gogo duzun artikulurako eskatzen didazun idaz-lana emen ez daukagu. Baezpada ere, Baionara eskatu dut bada Alderdiko idaztitegian antzinako Euzkadi aldizkaria idukitzea baliteke. Oraindik ez didate igorri, eta eneganatuko dan bezin usu bialduko dizut. Neri ere beste lantxo bat eskatu didate «Arana-Goiri euskal-idazle» alegia, zenbaki ortarako. Ez dakit nola burutuko dudan egin-gai ori, aren idaztietatik bat ere ez daukat bada emen eskuor. Zerbait asmatu bearko dut burmuinak estutuz.

        Zuk ez didazu Bidalien Eginetaz deus ere zure idazki ederrean aipatzen. Alare Etxaniz jaunaren bitartez berriak izan ditut. Ez nuen usteko eliz-agintariak ain erantzun ergelik eman zezaketenik baimena ukatzeko. Ageri da gure izkerakiko daukaten erra eta gorrotoa. Bide ortatik Euzkadiko sinismen-oztua, otzagotzea baizik ez dute iritxiko. Labaienek bestalde, Donostiako Gotzaitegian zure liburua lo dagoela esaten dit baimenaren zai. Zearo baimenik ez dizutela ukatu esan diteke.... Zein dago izpidean, Etxaniz ala Labaien? Orra nundik zure liburu ederra samin-iturri gertatu zaizun. Dana dala, an ezin bada, emen edo beste nunbait argitara bear dugu beintzat zure idazti bikaina. Ni gertu naukazu nere alegin guztiak egiteko. Agindu bada adiskide, eta nai zenukenean ortara jarriko naiz.

        Miranden olerkiak laster argitalduko dira. Jakina, aiek ez dute gotzaiaren baimenik bear ez eta Laterriarenik ere. Nere adiskide batek ordainduko ditu eralgibearrak. Izen onekin ekoiztuko ditu olerkiak: «25 Poema» Badira zuk ezagutzen ez dituzunak ere. Lapurdiera klasikoz (?) antolatu ditu poemok. Nere naigabea erakutsi nion olerkariari, bainan ez nuen iritxi gipuzkera-osotura malgutzerik. Alaz ere, ez da Krutwig bezin biurri izkeraz, asmoz biurriagoa izan arren. Gainera izkera berri orrek, irakurpena zearo lauzotzen du euskaldun geienentzat ainbeste H kin. Ni ere zurekin nago gainera, aurrenez euskal arrobia sakon-sakonetik inarrosi bear dugula. Badago an zeri eutsi jauregi apain bat eraikitzeko. Irakurri nituen, pozik alajaina, Ormaetxeak Gernikan idatzi dituenak idazkera berri orri buruz. Ezin uka izpidean dagoenik.

        Londresko BBCtik itzaldi batzu eskatu dizkidate XVI.go euskal elertiari buruz. Bat idatzi eta igorri nien Detxepare gaitzat arturik. Onetsi zuten eta geroago erdel-itzulpen bat ere eskatu zidaten. Au ere bialdu nien, eta ez dut arrezkero ango berririk. Euskal mintzalditxuok Urrutiak egin oi ditu, geienetan, beldur naiz ez ote diran BBCkoak ausartuko Aba orri bere mintzaldiok kentzen. Ondo egingo dute gainera, ni baino iaioagoa baita ortarako.

        Oso atsekabeturik bizi naiz aspaldi ontan eta erabaki sendo bat artuko dut nere bizi-bidea zearo aldatzeko. Lanerako gogoa geroago akitzenago ari zait. Emen ez daukat girorik ain maite ditugun lanei bear genuken gogo-giro paketsuan ekiteko. Ez ezadazula aztu, otoi, egin zenidan eskeintza ederra. Biotz-biotzean daukat eta uda au bukatu baino len zirt edo zart egin bear dut. Ez zinduzket zu nekatu nai, neke-biderik aski duzu, bainan erbestaldi gorri onek maiz esku-luzatzera beartzen gaitu damurik atzerrira beartuta gaudenok. Argi esan, zure ondora nai nuke, lur-lanean baino ezpadare ekiteko. Emengo adiskide, edo adiskide antzekoak, aspertuta dauzkadala iruditzen zait, eta orrexek biotza zanpatzen dit arkaitz tzar batek baino areago.

        Ene agurrik eta besarkadarik beroenak ar itzatzu adiskide.