—175—

JON MIRANDE

Olerkari Gurenari

Parisera

Caracas, 1958-VI-11

        Adiskide maitea:

        Naiz ta zuzenbidea oker ekarri, zure gutun atsegina garaiz iritxi zen ene eskuetara, postarien buru azkarrari eskerrak. Zuzenbide zar ta berriarekin alako naaskilo entelega-gaitza egin zenuen eta nere bein beineko egoitza jakin dezazun ez geiago naaskilorik egiteko, onatx emen:

                Avenida de las Fuerzas Armadas

                San Ramón a Crucesita

                Edificio Hernandez Apartamento 14

                Caracas-Venezuela

        Baina, elas, laister zuzenbide onek ere ez du balioko, bada il hunen hurrentzan nere ilobak etxez aldatu nahi luke, oraingoa baino apartamentu eroso ta zabalagoa ukan dezagun, eta zuk ondo dakizunez, emaztekiek nahi duten guztia iristen dute. Dena den, abisu berri artio, igor izkidatzu zure gutunak aipatu «Indar Armatuetara».

        Bada igorri nizkitzun gure aldizkariaren iru zenbaki, oraino atera ditugun guztiak alegia. Alako jeltzaletasun-sunda (ene errian esan oi dutenez) atzemanen diozu errebista orri... bainan ez geiegi fida... Jel-Alderdiak zaputz egin digu, eta engoitik abertzale aldizkari bat besterik ez da izango Irrintzi, beraz Euzkadi da euzkotarren aberria ontzat dadukaten guztiek idatzi lezakete aldizkari ortan, bat ere Jainkorik dela sinisten ezpadute ere. Ori bai Euzkadi dala euzkotarren aberria sinistuko ez lukenaren idatz-lanik ez dugu argitaratuko, ots Euzkadi ukatu nai duenik ez dute gure aldizkarian tokirik izango.

        Orain arteko edozein abertzale aldizkarietan baino toki garaiagoa eta zabalagoa eman nai izan diogu euskerari... eta gaur gero ere ala egingo dugu. Baina, zoritxarrez, neonek idatzi bear dizut geiena oso eskax gabiltzalako emen gaindi euskal-idazlez. Zure laguntasuna, Jon, ezin obeki letorkiket, eta zure artikuluak pozik argitaratuko ditugu naizta nazi asmakari beltzez gainezka etorri. Auxe bai esan nahi dizut, asmakariok gorago ezarri dudan egia berdaderoaren barnean kokatuak bitez. Jo itzatzu gogor gure basko txepel, alper, eta burugalduak. Ona litzake abertzale alderdi guztiek gaurdaino euskerakiko erakutsi duten narda izigarria nabarmenduko bazenu. Gure aldizkari au politika utsezkoa da, eta euskal-politika inarrosteko egina... Beraz ekin politikari. Obe artikulu laburrak luzeak baino, zuri ez dizugu neurririk jartzen engoitik dakigulako ernagarri ta irakurgarriak izanen direla.

        Izugarrizko eskandala sortu da emen gaindi Irrintziren inguruan Euzkadiko jaurlaritza bere lekuan ezarri dugulako, ots espainiarrekin besarka gogorrenean, eta gainera gure asmoak eta nahiak jaurlaritzatxo orren gainetik eta gorago dioazela argi ta garbi aitortu dugulako. Jel-Alderdiari ere jipoi ederrak eman dizkiogu, espainiarrekin paktu inozo ta burugabekoetan naasi delako, jaurlaritzari jarraituz. Argi ipini dugu, ez dugula gure etsaiekin ezertxo ere nai, espainiar ta prantzesekin alegia. Geuk, geure aleginez Euzkadiren zoriona iritxi bear dugula, alegia, eta ez inola ere gu menperatu ta saltzen ibili izan direnekin, espainiar errepublikanu, monarkiku ta beste kasta guztiekin. Geienak gurekin daude, eta ondo artua izan da gure oiu latza. Eta oraindik latzagoak ere baditugu esateko.

        Asketsi, otoi, ene gutun luzeegi au, eta...