—43—

JOKIN ZAITEGIri

Guatemalara

Paris, 1951-IX-22

        Adiskide laztana:

        Eskuratu nizun zure idazki atsegina, baita ere azken Euzko-Gogoa, Orril-Garagarrilekikoa alegia. Gure lankideak ugaritzen ari dira, berebiziko lankideak. Eder irudi zaizkit Oiartzabal eta Etxanizen lan sakonak. Egia esan, azken onekin ni ere enaukazu erara, batik-bat maitasun-idaztiak egin bear genitukela dionean. Ortara jarri aurretik, zaletasuna errian bertan pizkortu bear dugu, bestela lan ori ere besteak bezin alper litzake. Gure lanak iraungo du noski, ori gora-bera, ta era ortako idaztiak egin gogo litukenak, egin ditzala, onurakor izango baitira. Nere ustea, orixe duzu beintzat. Baten batzuk, oro ezpaitira berdinak. Ni neu beintzat, beste gabe, eleberrigintzara jarriko banintza, lan utsa nukela derizkiot. Ortarako ere jaio egin bear, eta euskal idazleen artean ere sortuko dira nunbait, agian, dagoeneko sortu ezpadira.

        Nere idazkeraz diostazuna ere, egia duzu. Erdalitz geigi darabilzkit nere lantxoetan. Nerez garbi ekingo nioke, bainan igorri ditizudan lanak, geienak beintzat, irratirako onduak nitun, eta irratentzuleak aisago ulertu zitzaten erdel itzak ere sartu ditut. Ba dizu euskerak noski erderara jo gabe gaiak adirazteko almen. Zure lanak aitor. Zuk ez duzula amor emango gai ontan diozu. Izpidean zaude. Nik ere amor eman baino gure bidetik ibiltzea naiago izango nuke, eta gaurgero alegin guziak egingo ditut euskerarik egokiena erabiltzeko.

        Azkenengo Gure Herria jaso dizut. Lotsagarria benetan. Oro pantzeraz idatzia, Tauer-en lan bat ez. Zer uste dute emengo platon-maitariok? Gainera erderaz darabilzkin gaiak ere, exkax xamarrak eta arinak. Gure aldizkarian gai bete ta jakingarriagoak darabilzkigu, euskeraz gainera errevista txatxu orien egilen laidogarri. Bainan ez dute ikasiko. Gabino Garrigak, guzizko lantxo eder bat, erderaz, Argentinako «Boletin»ean argitarazi du. Merezi luke euskerara itzuli ta gure aldizkarian argitaraztea. Nerau saiatuko naiz, eta ez dut uste egileak ortarako oztoporik jarriko digunik. «Sugestiones vulgares del centenario de un libro euskerico» du izentzat lan orrek.

        Urte Guziko Meza-Bezperaketaz idatzi dizudan iritzia igortzen dizut. Iru orrialde. Lan osoagorik merezi du idazti orrek, besteren bat saiatuko al da nirea baino kritika egokiagoa idazten. Azken aldian Orixe, euskel-izenak dirala-ta, zirikatzen dizut. Ez al du gaitzez artuko nere oartxoa.

        Emengo idazleak bizkortzen ari nauzu idazlanak ondu ditzaten. Alper xamar gaude, emenguok beintzat. Gainera, aldizkaria aurreak artzen ari zaigu eta ala obe. Zer derizkiozu inguruetan argitaratu aldizkarietaz bi-ilabetero laburpen bat egitea? Ortara ere jarriko naiz, egoki baderitzaizu.

        Eskerrik asko nere agiriekiko arduratu zeralako. Orko baimena iritxi bezin laster, inguruak arakatzen asiko naiz bidea gertutzeko.

        Zugadirentzako eskutitz bat idazki oni erantsi diot, emango al diozu.

        Agur adiskide laztana, eta laister arte.

        (Mila goraintzi Mirandeketz. Olerki gordinak txukuntzen ari da argitaratzeko. Txukundu edo zuzendu ala, igorriko ditizut, zuk ere argitara baino len ikus ditzazun. Galdeka ari gera olerki idaztia ekoiztea zenbat gostako zaigun. Eskerrik asko zeure eskutitza ederragatik. Gure aberats-ustelak badute nun ikas, zure jarraipide ederrari begiratuko balie. Bainan beti berdin. Agur).