—140—

ALFONTSO IRIGOIENi

Bilbora

Guatemala, 1954-XI-16

        Adiskide ona:

        Oroitu ez? Nik ere ez dut beingoan ahantziko Mirandek eta irurok elkarrekin eman genun arratsalde ura. Arkaitzean elatzak baino tinkoago diraute ene baitan zu bezelako euskalzale jator-langileen irudiak eta itzak. Egia esan, ni ere maiz egon natzaizu lerroño batzu zuzentzekotan, zure iraileko gutunak, ordea, aurreak artu dizkit. Aitortu bear dizut, ala ere, astirotxo ibili dala, gaurdaino etzait eskuratu bada. Eta berantetsian zaudelakoan bat batean erantzutera jarri natzaizu.

        Aresti olerkari gaztearen poemak atsegin bitsetan irakurri ditut. Badu ezpal eta gogo-giro gazte azkar orrek. Itz-lauzkoa ere siratsgarri izan zait. Euskerari orren sutsu ekiten baldin badio, uzta bikainik bilduko du Aresti gazteak. Aurtengo irugarren ta laugarren zenbakiak irarrita dauzkagu eta egunotan aizetaratuko ditugu. Beraz, olerkari ta idazle berriarenak urrengo banakoetan argitara emango ditut; lenbizikoan «Dance dans la Prière» ta «Godalet dantza», ondokoan «Prelude à la Musique de la Dance».

        Ain zuzen, aspalditik Bilbaoko euskaltzaleak zertan ote ziran jakin nai nun, eta orra zure eskutitzak jakinmin ori ase dit. Dakustazunez gogoz ari zerate gazteok. Gazteak bear ditugu euskal arloan, bestela zarrok suntsitzen geranean euskerarenak betiko egingo du. Euskaltzaindik ere gazteen eskuartean bear luke, kemen ta gogo berri bat txertatuko dien gazte azkarren eskuartean, ez zarrakituen esku dardaritsuetan. Gure garai auek ez dira noski, euskerarentzat onezkoenak, ala ere kemenak bikoiztu bear ditugu gure ondasun bakarrari eusteko, eta indartuz, berean iraun erazteko.

        Gu urrutiko eremu auetan aldeguntxoa egiten ari gera. Izugarrizko oztopoak garaitu bearrik arkitzen gera aldizkaria ateratzeko, irarkolako langileak dirala-ta. Gu baino motelagoek oraingoz bertanbera utziko zuten. Lenago lertu, ordea, ilten utzi baino. Egun auetan amaitu dut Barandiaranen euskal-mitologi berria euskeraz. Aldizkarian agertuko da zatika. Orrez gainera, Vergilius-en Unai-kantak ere gerturik dauzkat argitaratzeko. Euskal literaturaren edestian ere murgildurik nabil. Liburu eder bat egin gogo nuke, nere almenak eskastxoak izan ordea. Zaitegik bere aldetik, Sopokel-en tragedi guztiak euskeratu ditu eta datorren urtean argitaratuko ditu liburu eder batean. Ez gera, beraz, alperkerian ari.

        Azkoitiko Sagartzazuri aurtengo banako guziak igorriko dizkiot. Jaso dut bere izena arpidedunen zerrendan. Beste zerbait nai bazenuke, idatzi, eta pozik beteko ditut zure gurariak. Bialdu, otoi, noiztanka orko euskal berriak aldizkarian argitara ditzadan.

        Anartean, ar ezazu adiskide, ene euskal agurrik kartsuena.

        Ez dakit noiz agertuko diran Miranden poemak. Irarriko zitutela itz eman zidaten, bainan oraindik ez dira ageri, damuz.