—49—

JON MIRANDEri

1951-XI-17

        Maisu garai:

        Emen dizut zure amaikakoa beti bezelako atsegin eta biotz-altxagarria. Ez dut uste nere txikitasunean egozten dizkidatzun goratzarreak inola ere ibazi ditudanik. Dana dala, orrek ere biotz axkara ematen dit eta gainera, au dugu onenik, lanera azkartu. Mila esker bada, adiskide ona.

        Aurrenetik asi bearrean, erditzulik asiko natzaizu erantzuten. Oraindik ez dizut jaso zuk bidalitako Etxanizen «Kanta-kantari». Or nunbait letu ote da? Iritxiko zait noski. Idazle atsegina dugu izkuntzari gagozkiola, olerkaria sakona ezpada ere. Txalogarriak dituzu orratio, bere aurrera naiak, baitere euskal mugak zabaltzeko darabilkin garra. Zer dala ta ez ditugu abestu bear euskeraz tango ta bestelako sanba ta runbak? Ortan Etxanizekin nagokizu. Donostian edo Bilbon biziko banintz euskal-kabaret bat irikiko nuke, orkesta bitxi batekin, edonolako ta edonundiko eresiak euskeraz emateko. Bai orixe. Gure arteko parisaitarrak gaiztatuko litzake, baina garaia dugu onezkero aien begietako ezkata ergelak betiko erauzteko. Geok ari izan gaituzu, orain arte, gere burua esku zakarrez itotzen eta buruarekin batera euskal gogoa ere irato dugu.

        Azken E.-G.z gainera Gernika ere igortzen dizut. Uts geiegi iraitzi dira nere lantxoa barna. Azken aldia batik bat, an argitzen duten bezala, ulerkaitza duzu nere ta Detxeparen esanak naasi ditutelako. Zuzendurik igortzen dizut. Pozik nago lantxo ori zuei atsegin zaizuelako. Garaia dugu euskal auzia dan bezela artu ta erabiltzeko, ez lotsarik ez bildurrik gabe. Asko poztu nau baitere Etxaidek esan dizunak, eta ene atseginak agertuko al dizkiozu. Atzo Zaitegik idatzi dit eta datorren E.-G.k larogei orrialde izanen omen ditu. Lerrenak egiten ari da gizajoa aldizkariari eusteko gure erri doakabeak lorik gaiztoenean dirauen bitartean. Noiz iratzarriko ote gera?

        Egun abetan azken urte auetan argitara diran euskal liburuetaz kritika laburtxoak idatzi ditut International PEN Bulletin of Selected Books aldizkarian inglesez argitaratzeko. Aien artean Alos-Torrea-rena ere egin dizut eta txalo beroak jotzen dizkiot Etxaideri. Laister argitaratuko ditute noski. Aldizkari orrek edapen aundia dizu ta mundu guziko idaztien berri ematen du enderriz sailkatuta. Aurreneko aldiz euskeraren berri argitaratuko aldizkari ortan. Beaz ari gaituzu gure ondasunen berri mundu zabalean ematen.

        Pozez gainezka naukazu aurrera daramazun lan ederra dalata. Ekin soin ta gogo izadi-gai liburu ederra gertutzen. Ene ustez, eskola gaiak antola bear ditugu beste ezer baino lenago, liburu apain eta borobiletan argitaratzeko. Ondo dakit asti andirik ez duzula izango, bainan ekin aspertu gabe eta eten gabe. Euskal idazlearen bidea malkarra duzu, eta gainera elkorra. Euskaldunok badugu oben andi bat, inoiz eskolak guretuten baditugu, aurren biotzetatik or uzteko alegin guzia egin bear dugu: gure ingurukoek egiten dituten lan aipagarrien aurrean sor-gor gelditzia, euskal-idazleak dagitenaren aurrean batez ere. Zenbat eta zenbat idazle atzeratu ote ditu gure basatikeri orrek! Ez gaituzu bear bezalako gizon oso, bekaizkeri ta gogo-laburrez usteldutakoak baizik. Aurrera bada adiskide, ongi dakit eta lan bikaina atera zaizula ortarako doaiak dituzun ezkero. Emengo prantzez libururik edo lagungarritzat bearko bazenu, eskatu arren, pozik igorriko dizkitzut eta.

        Enoakizu nere eskutitz au gizenagotzera, beaz ementxen bukatzen dizut.

        Ene agurrik laztanenak orizkitzu.