—37—

JOKIN ZAITEGIri

Guatemalara

Paris, 1951-VII-19

        Adiskide laztana:

        Artu nizun zure eskutitxoa. Ez dut uste zer onik egin dezakegun, eni buruz, Muñoz Meany-ren landolan. Geroak esango du ori ere. Nere eskerron eta sakonenak zuri agertu gabe ezin nindagokezu.

        Azken Euzko-Gogoa ere iritxi zitzaidan. Ederki dago ta bereala idatzi nun nere eritzia irratirako. Barreiatu dute dagoeneko. Badakizu, idatzi bainizun, etxetik kanpora biali gaituztela Pranko bide dala. Beraz ez aurrerantzean etxe artara deus bidali. Nere zuzenbidea badakizu: 5, rue Quentin Bauchart, Paris VIII alegia. Ordezkaritza berriarena berriz, urrengo au: 50 rue Singer, Paris (XVI) edota, Boite Postal 59 Paris, XVI. Beaz badakizu norat bidali zureak oro. Gainera, azkenengoz igorri zenun Euzko-Gogoa mordoa, Irizarrek esan didanez, pakete guzia urraturik eldu zan, izparringiz egina zegoalako. Urrengoan paper sendoagoz egina biali ezazu.

        Zortzi lantxo bialtzen dizkitzut, eneak oro, eta onela sailkatu ditzakezu, argitaragarri baderizkiezu:

Idazti Berriak: «Basarriren bertso sorta»; «Yulio Urkixo´ri Goratsarre»; «Auzi-mauzi» lantxoa; «Ezkila Argitaldaria» - Euskeraren Kabia lantxoa.

Aldizkarien Berri: «Euzko-Gogoa» (Azil-Lotazila 1950); «Euzko-Gogoa» (Ilbeltz-Otsaila 1951).

Edesti: «Israel». Lantxo au Tel-Aviv-era igorria izan da itzulita.

Euskera: «Paper artean ito bearrez»

Gizartea (?) «Joanes d´Etcheberry euskal gurasoetan argi ta bikainena»

Olerti: «Jei-Gai» Miranderena.

        Ez dakit ongi ari naizen. Esaidazu, argi ta garbi, nere lanok zer deritzaizun. Orixek zer dio? Egia esan ez dut ez betarik eztare aldarterik, nere idazlanak bear bezala txukuntzeko. Geienok radiorako onduak nitun, aldizkarirako asmoa ere, Alderdi eta Gernikarako: «Nori Berea», «Erri-agintea eta Izkuntz-auzia Noruega´n» Alderdik argitaratuak. Fagoagari «Bernard d'Etchepare» izeneko artikulu luxeskoa igorri nion Linguae Vasconum Primitiae gaitzat arturik. Ari nauzu, eta are ari gaituzu, euskeldunak gure lanak aintzat artzen ezpadituzte ere.

        Emengo idazleak, Mirande ta abar, oporrak egiten dituzu Euzkadin eta ez didate lanik bat ere eman. Badakit Mirande Nietzsche-ren filosofiaz zerbait ontzen ari dala. Beste idazle gazte azkar bat ere arkitu det, donostiarra au, emen bizi dana. Lan ederrik onduko digu noski. Gazteak geureganatu bear ditugu, euskerari eutsiko badiogu.

        Zer diote ene adiskide Zugaditarrak. Aspaldi ez dizut Antonen berririk. Ari nauzu papelak atontzen, IROri bederik, eskatu diot laguntza. Oraindik ez dit erantzun. Idatzi len-bai-len adiskide ona. Artean nere besarkadarik sendoena.