—154—

JON MIRANDEri

Parisera

Caracas, 1956-X-9

        Adiskide maitea:

        Zure gutun txoragarria gantzu eder izan zitzaidan ene biotzeko. Orrelako gutunak, bakanki baizik ez dira ene eskuetaratzen. Mila ta mila esker, beraz, ene adiskide biotzeko. Zure gutun berrien zai naukazu basamortuko lilia intzaren baizen aiduru. Usuagotuko aldituzu gutunok biotz atseginerako. Nik usuagotu nai nituke, bainan egia esan, ez dut betarik are okerragoa, ez dut gogorik. Emengo giro au guziz aunatzaile ta zainiltzaile duzu izan ere.

        Leenik milesker ene amarekiko erakutsi dizkidazun naigabeen alderako. Agiri denetik obekuntza andia egin du azken ilabete auetan eta letraño batzu ere idatzi dizkit, eztitan irakurri ditudanak. Ala ere arrituta geldituko dala uste dut.

        Ene zorionak igorri bear dizkitzut zure lan ederrak dirala kausa. Irakurri dut Eganen argitaratu duzun ipui polita. Zure eskutitzan agintzen dizkidatzunen zai naukazu. Duda gabe zure luma joritik atera diren lan paregabeak bezalakoak izango dira. Baita ere gogoz irakurriko nituke zure olerkiak ere. Beraz, adiskide, igor izkidazu lehenbaitlehen gogo onen asetzeko.

        Mikel Deunez, ala bearrik eta Irizar adiskide komunak eskeini zidalako, itzalditxo egin nuen emengo Eusko-Etxean. Jente aunitz eldu zen ene ergelkeriak entzuteko. Arrigarria, danak zeuden adi adi ene ao gaizto ontatik ateratzen ziran itzak entzun gogoz. Mikel deunaren kultua euskal mitologiaren erraietatik sortua dela erran nien, Eren-sugearen mitutik alegia... Jainko zale ta gizon onek ez dakit zer erranen ote zuten ene teori berri ontaz. Badakit batenbatzu etzirela kontent gelditu... Bainan geiegi ezjakinez edo, ontzat artu zuten ene itzaldi ergela. Jakina, artean gogorrak ere erran nizkien, batik bat oraingo ontan gu irentsi naiez daukagun erensugea bide zala. Zazpi buruak zenbatu nizkien, Goñiko zaldunaren g[...]ko dragoiarenak baino kaltegarriagoak. Eta an atera ziran gure erri doakabe ontako gizamaila geienak, agintarietatik asita. Pozgarriena au izan zitzaidan: egun ortako jaia guztia euskal-jaia izan zala. Inortxo ere etzan erderaz mintzatu... Nere beldurrez ote?

        Oraingo ontan Aita Donostiari omenaje bat gertutzen ari dira eta egun ortarako ere ni aukeratu naute izlaritzat, bainan erderaz emateko esan didate, emen eunetik irurogeik ez omen dutelako gure izkera ulertzen. Or ikusiko dut, zer egiten dudan.

        Emen ari naiz, bulegoan, nere lanari denpora ebasten zuri idazteko. Beraz bukatzera noa, ez noski damu gabe, bada zurekin etengabea jarraituko nuke izketan.

        Ene goraintzi minenak zure gurasoei. Esaiozu zure amatori alakoen baten inguru bat egiterat Pariserat urbilduko naizela. Baliteke oraingo nere egokera erdi erromes au zuzentzea... Eta orduan Jon, emendik joango nauzu zuri al dudan guzian laguntzeko.

        Ikus al dituzu Etxaniz eta beste adiskideak? Igor laister zure berri onak. Anartea ene besarka sutsu bat ar ezazu.