—73—

JOKIN ZAITEGIri

Guatemalara

Paris, 1952-IV-26

        Nere adiskide:

        Zure 7ko idazki garaiz artu nizun. Nere 3koa artean eskuratu zitzaizun, nunbait, zenbait idaz-lanez inguratua. Azil-gabonilari dagokion E.-G. ementxe daukat. Mila esker. Zerbait esatera noakizu banako ortaz. Olerti: Nor dituzu lenengoz agertzen zaizkigun Aurraitz eta Bordatxuri olerkariak? Batez ere bigarren orrenak atseginez irakurri ditut: ez duzu olerkari txepela, zeori zerala esango nuke, beinipein ba dizu zure eiterik. Aurraitz-enak ere politak dituzu. Orixeren «Getsemani», zer esanik ez. Beste olerkiak sakon eta barne-giroz gainezka. Gure aldizkari ederra euskal-olertiaren gailurrak jotzen ari da. Euskera: Ez al duzu areago luzatuko Jemein-en auzi ori. Aspergarri gertatzen ari zait. Ez digu berririk bat ere euzk-eusk inguruan ekarri jaun orrek. Lendik ere orok ezagutzen ditugu bere arrazoiak, beraz ez daukagu orrialde geiago ortan erre bearrik. Aranaren onak ez ditugu ukatuko, aren jarraile gera, bainan Orixek ederki diotsonez Jadarka-ri, ez dugu Sabin-zale itsu izan bear. Itsukeriak ikusten da zer dakarren, guzieki bekoz-beko ibili bearra, Jadarka bezala. Beaz, auzi ori bukatu ezazu arren. Badago nun erabili idazkortzak. Labaienen «Meza-bezperak» poliki. Baina lantxo au, osorik ezpada ere, Aranzazu aldizkarian agertu da. Guretik ar dezatela nai dutenek, bainan gure aldizkarian agerturikoak originalak bitez. Beste nunbaiten argitara dan lanik, ez gure aldizkarian onartu, ez daukagu otapur eske zertan ibili. Nik, esate baterako, Gernikarako idazten dedan lanik ez dizut zuri bialtzen, eztare Alderdirako egiten dudanik ez zuri ez Fagoagari. Euzko Deyan idazlan-bi argitara nitun Orixeren Euskaldunak-az, bata erderaz bestea euskeraz, Azkue zanaz ere beste bi, erderaz eta euskeraz, ala ere etzait bururatu ere, apurrok Euzko-Gogoan ber-agertzerik. Lan bereziz aurreneko mailan bear dugu gure aldizkaria. Yakintza: Gogor ari zaigu Urrutiatar Gotzon, ala obe. Ikusi dut nere botanika bukatu duzula, beste zerbait bialiko dizut sail ortarako. Miranden Psykhologiazkoa, ederki; zer ikasi ugari gai auetaz jardun-gogo dutenentzat. Ez diot berari erakutsi. Datorren igandean Peillenen etxean elkarrekin apalduko dugu eta ortaz mintzatuko gera. Elerti: Talaimendi (Labaienen ala Etxaide?) biziki tajutua. Ametzagatar Bingenen itzulpenak oso ederki antolatuak, gainera gai berri-berria euskeraz. Ba omen du jaun orrek Shakespearen antzerki bat euskeratua: Zuri igortzeko esan nion E.-G.n argitaratzeko.- Idazti Deunak: Nere erritar zan aita Imanolen «goizparrkijak» argitaratzeari ondo derizkiot. Zer ikasi baduke euskaltzaleak aren lan sakonean. Zure Bidaliek Eginak zoragarria. Noiz argitara bear duzu liburu baten? Zure artikulua irarteko erabili duten elatza oso egoki irudi zait. Ene atseginak, banako ain joria eman diguzulako.

        Nere egungo bialkuna utsa ez dedin, Irazustar Jon Andoni zanaren oroitzapenetan idatzia igortzen dizut. Eleberriaz ari naiz, bainan lan exkaxa atera zait. Aspaldi ontan euskera burmuinetik igesi dabilkit. Sarobe zana ere aipatzen dizut idazlanaren azkenean. Orrela gure lankide izanok nolarebait goraipatzen ditut.

        Turut saneurriak or dioazkitzu. Orixeri idazten badiozu, nere atseginak emaizkiotzu. Meza-Bezperak dagoneko zitu mardulak ekartzen ari dituzu. Ikusi dut Aranzazu aldizkarian aren goratzarretatik artutako aapaldi bat euskal lantxo baten apaingarrirako. Loiolako jesulagun bat emendik Alemanira bidez igaro da: ua ere txoraturik zegon Orixe aundiaren euskerapenaz. Agur adiskide: besarkada sendo bat orizu.