—182—

JON MIRANDEri

Parisera

Caracas, 1958-X-27

        Adiskide mami:

        Zor andiak eginak ditut zurekin oraingo ontan eta ez dakit nola garbitu nitzaken ain berandu ibilki. Onuzkero Euzkadiri ez-ezen mundu guztiari ere eman diozu itzulia zure bakantzetan. Anartean nik igorri nizkitzun aldizkariak zureganatuko ziran or nunbait. Dena den, ni oso lanpeturik nabilkizu nere opizio berri onetan; oraingo lanak ordu guztiak jaten dizkit eta ezertarako ere gogo gabe uzten nau. Auxe duzu nere patu gogorra, moko gabea jakina. Gainera egunotan bururatu zaio nere ilobari aur-egitea, eta mutiko bat ekarri digu mundura, ustekabean ez, bederatzi ilabeteko izorraldi baten ondoren baizik. Aitor izena eman diote, zure erritar Txao aundiaren goratzarretan. Orain arte mutikoak ez dut besterik egin: negar, pix eta kaka. Batiatzeke dago oraindik, eta bear bada batio sainduko ur garbiak artzen ditunean bere orain arteko jokerak aldatuko ditu. Ala biz.

        Zure gutunak aunitz aski estimatzen ditut eta ezin esan alako poz andi batekin irakurtzen. Idazlanak, zer esanik ere ez. Bi idazlanok ateratzen ari geran Irrintzi berrian sartu ditut euskerari dagokion arrotasun eta aunditasuna emateko. Berri pozgarriak ditugu gure aldizkariaren inguruan, batez ere barnetik artu ditugun berrietan. Egunotan, ain zuzen, Donostiako Euzko-Gaztedik idatzi digu, zorionik beroenak bializ Irrintzikoei, zuri ere bai. Oso pozik irakurri omen dute, eta guziz onartua izan omen da gazte-jendearen artean. Gainera gogor jotzeko eskatzen digute diralako Abertzaleak lo zorroan daudelako. Baina gutun ori aldizkarian ikusiko duzu eta ez noa ortaz geio ezer idaztera. Dakutsunez, bentan berri onak.

        Zure asmoak, Breiztarrakin artu-emanak alegia, onuragarriak lirake gure aldizkingirako. Len ere esan nizun, izkera arrotzez zerbait idaztea, ondo derizkiogu, baina guk ez jakin, elas, pantzera edo engladeraz bear bezela idazten. Ala ere zeorrek edo beste norbaitek idatziko balu, enura gabe argitaratuko genuke. Catalandarrekin artu-emanean ari gera, Estat Catalakoekin, oiek baitira aien artean askatasunaren alde benetan oldartzen diranak.

        Zerbait iristen ari gerala uste dut gure aldizkariarekin, eta abarrots naiko ateratzen ari gera inguruetan, eta oraindik ere geiago aterako dugu. Azken zenbaki au oso gogorra dator, eta abertzale zintzo zenbait samurtuko zaizkigu noski.

        Ar itzatzu adiskide ene besarkadarik sutsuenak. Ene goraintzi minenak zure aitari.

        Barka ain arin ari natzaizulako.