—59—

JON MIRANDEri

Paris, 1952-I-2

        Ene adiskide ezti fi:

        Urtatsarekin zure atzokoa emen dizut, baita igortzen didazun «Psykhologi-gaindiko gertariak» zure lan ederraren bigarren parthea. Arterik artzeke irakurri dizut, eta on baino obeago irudi zait. Gure izkuntza zaarrari giro berri ematen ari zaitugu, ain egoki jalkitzen baidituzu gai sakon ta berez elkor oriek. Zure luma muturrean, benetan ernagarri biurtzen dira psikhologiarekikoak ere. Mutila zaitugu, beaz aurrera bide eder ortati. Atzo goizean, ain zuzen ere, Fagoaga adiskidearena ere uki nizun eta zuretzako itz auek dakarzkit: «A Mirande, a quien acabo de mandar el número de Gernika, le agradeceré le diga que su bella composición Mendi Gailurretatik, sale en éste número de Enero y que espero otra u otras juntamente con la suya (de usted, y le ruego déle de mi parte un cordial zoriona para el urte-berri». Beaz ba dakizu. Gernikaren zenbaki berezia gertatzen ari da dagoeneko, eta zure ta nere lan-batzu nai lituke zenbaki ortarako, bainan ila unen azkena baino lenago igorri bear ditiogu argitaragarri ditezen. Zenbaki ortarako zerbait ondu bear zenuke, Gernika uria gaitzat arturik naiz olerkiz, edota itz-lauz. Gure zugaitz zaarrak, paganu-ikur biziak, ez ote dizu gogamena ernaltzen? Or ikus.

        Zure asmoak benetan gailenak. Onatx, ni emen, zure mende «Psykhologi-Gaindiko Eusko-Ikerkuntza» ortarako. Zer onik egin dezaket? Barandiaran jaunari aspaldi idatzi nion bere eusko-mitologiazkoa eskatuz, bainan ez dit ez erantzun ez igorri. Aserre ote dago nerekin? Ez dakitzut, bainan ain luzarako ixilaldi orrek susmo okerrak ematen dizkit beintzat. Ala ere «Manifèste des Neo-Païens» ortarako zerbait eratuko duzu noski aren laguntzik gabe ere.

        Damu dut bluiarekikoa egin duzulakotz. Gaxo zakil! Arkituko du bertze alubideren bat, noski. Urtezar gaua, dantzaldi ta ordialdi zikinenean eman nizun. Biotz-garbairik gorrienean arkitzen naiz orain.

        Zaitegirena egun jaso dizut. Ara zer diostan: «Ez larritu, neonek igorriko dizut onat etortzeko dirua zure bear aundia dut bada ikastetxe berrirako eta aldizkarirako». Ez dakit aren eskeintza jasoko ba dut, bada adiskide aundi izan arren, ez nizuke gizajoari dirurik eralgiaztea nai.

        Nahi bazenuke eldu den neskanegunez bil gindezke iru orenetan Alma-ko kafetxean. An izango naiz ziur aski. Ez dizut lenagokorik egingo. Eskurat emango dizut zure bigarren zatiaren aldaketa.

        Urte-berri, alu berri, orratx zure ikurra aurtengotz, eta enia ere bai.