—245—

JON MIRANDEri

Parisera

Caracas, 1967-I-28

        Adiskide maitea:

        Emen natorkizu, «goizian-goizik», bulegotik zure iru gutun atseginei erantzutera: bata gabonetakoa, bigarrena luzea eta irugarrena laburtxoa, irurak garaiz eldu zitzaizkidanak eskuetara. Eskerrik asko adiskide maitea.

        Dakustanez eskuetara zaizu gure liburu Bergiliren Idaz Lanak Osorik; neonek esan nion Onaindiari zuri ale bat igortzeko eta gainera ale orren barnean sartzeko tarjetatxo bat ere igorri nion eskutitz batzuekin. Bialdu ote dizu? Beldur naiz, prailetxoak oso izan oi baitira zenbait gauzetarako ahanzkorrak guztiz. Dena den, or duzu beintzat liburu famatu ori. Dagoneko esan didate, beste irarkola batean argitaratzekotan, askoz ere txukunago agertuko zela. Baliteke... baina txanponak? Ala ere azalez eztagoela ain gaizki derizkiot. Barnez ere gogorskoa izaten da bizkatarrai dagokigun lez... Eztut beraz uste, arrakasta aundirik izango duenik gure liburu orrek... Gaia berez zaharra eta itzultzaileak ere zaharrak... zer nahi duzu atera dedin? Astun eta aspergarri. Bainan egina dago, aspaldi eginik bear zukean liburuak gure eliz-gizon latin-lantzaileek, gure euskera benetan maite izan balute... Bainan erri eskualdunetan euskera besterik erabiltzen etzelako. Eztu beraz arrakastarik izango gure liburuak, darabilkin gaiagatik, eta gainera gure izentxoaren ezjakintasunarengatik. Ala ere eztut damu egin lana.

Juduetaz idatzi duen «kristau» ori Mardones Jauna duzu, legegizona, adinean naiko sartua, eta abertzalea gainera. Egia esan bear dizut, neri ere etzitzaidala kritika hura atsegin izan eta enekiko aldizkari ortan alakorik agertuko zenik... Zergatik egin ote du hori Mardonesek...? Eztut uste judu zale porrokatu orietakoa denik; nik adina ezagutuko balitu elitzake izango beintzat. Baina etzaitezela orregatik gure aldizkaritik atzeratu; gaurgero eztut beste orrelakorik argitaratuko denik. Euskerazko lanak, denak dira nereak, prosazkoak alegia baita sarrerakoak ere. Larramendirenean bizkaiera zaharra erabili nuen gure aldian apaiz askotxo euskeraren aurka dabiltzalako. Bigarren zenbakia gertatzen ari gera, eta poztuko ginake beste zerbait igorriko bazeniguke euskeraz naiz prantsez eta bietara balitz obe. Badakizu, gure aldizkaria eskaxa oso izaki, idazlanak ere laburtxoak bear dutela. Margolaria, Pruden Arozenaren emaztea da, frantximanta izan arren gure adiskide aundia Euskadi bihotzez maite duena; eztakizu ondo nola poztu zen zure zorionak eman nizkionean. Zuk zure olerkiren batekin gogo zenuken marrazkiren bat eginda bazenuke, biali argitaratuko dugu-ta. Otsailaren erditsurako egin nai genuke zenbaki berria. Nik Lauaxeta gure olerkaria zenaz zerbait idatziko dut; aurten osatzen dira 30 urte prankozaleek Gasteizen eran zutenetik.

        Emen dut Txominen gutuna ere, bainan bere zuzenbidea ezartea ahantzi zaio gure eleberrigile pamatuari; zeorrek bialiko bazenida erantzun dezaiodan....? Asko poztu ninduen bere gutun ederrak.

        Ar ezazu adiskide ene besarkadarik sendoena eta zure aita maitearentzat ere beste besarkada aundi bat. Onik izan biok.