Susa / Erbestetik barne-minez (gutunak 1935-1967) / Andima Ibinagabeitia

Sasoia ere banun onuzkero, zure gutun ederrari erantzuteko. Ez dizut lenago erantzun E.-G.ren bigarren zenbakiaren zai egon naizelako. Zoritxarrez banako ori ez da orainik nere eskuetaratu, eta ezta eskuetaratu ere egingo, bada emengo geienek, jaso ditute bear zan garaian. Nerea galdu edo egin da or nunbait. Ala ere zearka bederik, ikusi dut Olariagari iritxi zaiona. Ederki arkitu dut, zuk zenion lez, aurrenekoa baino okituago. Ala ere ezin nezaizuke iritzirik eman, azaletik baizik ezpaitut irakurri. Astiroago irakurtzeko eretirik dukedanean, zabalago mintzatuko natzaizu ortaz.

Eganen azken zenbakia ere ikusi dut, au ere arin xamar. Ala ere Mitxelenak zuri buruzki idatzia osorik irakurri nizun. Astindu ederra ematen dizu, baina baita ere zere burua zuritzeko akiakularik aski. Ageri du zure, Euskera aldizkariakiko iritxi laburrak bazterrak inarrosi ditula. Bertzalde oso bete eta oso egoki datorkigu aldizkari auxe. Ez da alperrekoa izan E.-G.ren jarraibidea, eta ori pozgarria da benetan guretzat.

Berri pozgarri bat eman bear dizut. Biar, 16, euskeraren alderako apari bat ospatuko dugu emengo Eusko-etxean. Lendakari jaunaren gutun bat iritxi zan euskeraren alderako diru laguntza eskatuz, eta Buruzagiaren guraria nolarebait betetzeko, apari ori antolatu dute. Apari-saria 50 bolibar dituzu, 10 aparia ordaintzeko, 40 euskerari laguntzeko. Dagoneko berreun maikide ditugu, beraz diru pilatxo polita geldituko da zure etxe, aldizkari ta beste zerbaiterako lagungarritzat. Nik uste, 8000, bolo, or nunbait bilduko dirala, beraz, 800.000,—franco. Ez da diru andi, baina zerbait bada. Beste lurraldeetako euskaldunak neurri berean erantzungo balute, izango zenuke nunbait zertaz euskerari lagundu. Ala ere, aitortu bear dizut, laguntasun au, emen daikenaren aldean, oso urria dala. Eta pirtzikeri ori iristeko apari bat antolatu bear, bestela laumakorik ere etzan bilduko. Nik ere eman nitun berrogeitamar boloak, txanpon bat ere ez alderatzeko euskeraren laguntasunetik apari antolatzaileei gogorki eskatuz. Apari ondoan, emango dizkigute nunbait garbitasunak, eta orduan zeatzago esan al izango dizut zer dirutza bildu dan.

Ederki Euskal-idazleen batasunarena. Bearrezko genun orrelako eralguntza andi bat. Emen ere bazkun orren adar bat sortzen leiatuko gera. Ez gera idazle asko, baina amar bat bilduko gera. Bazkideek, saria ordaindu bearko dugu nunbait; esaidazu zer sari eman bearko genuken idazle-alkartasun ortarako.

Gaur ere ez dizut Mantxiri buruz dudan iritxia bialtzen, ezpaitut astirik izan garbitan aldatzeko. Esan nion gure azkoitiar jatorrari zuk zeniona... Ez zitzaion bat ere atsegin izan. Ez duzu orregatio iritzi gogor ori argitaratuko... Ez ditugu geure idazle maiteak, diranak diralakoak euskal arlotik astandu bear... eta askotxo laster mintzen dira iritxi gogorren azpian. Ez bada, otoi, orrelakorik egin. Mantxi bera oso naigabeturik zegon Iliasenari buruz Mitxelenak eman duen iritzi gogorra dalabide. Nereak baditu egiak ere, baina goxoki idatzita dago. Laster emango du argitaratzeko Mantxik urte-guziko santuen bizitzai dagozkien lenengo iruilabeteko bizitzak. Gerturik dauzka, itzaurre ta guzti. Itzaurre ortan, zure Bidalien Eginak goraipatzen du. Lau idazti izango dira, bakoitza bosteun bat orrialdekoa. Aita Bitor Iriarte izan da or gaindi. Lengo batean itz aspertu luze bat egin gendun, eta zutzaz ere jardun gendun. Etxeberriakin izan da Erroman. Antxe ikusi omen du zearo gertuta irarkolarako Olabideren Itun Zar osoa. Pozgarria benetan, baina diru-zai omen daude argitaratzeko. Etxeberriak bere lana bukatu du, oarrena alegia, eta orain irarkola lanak asteko zai omen dago.

Orra emengo berri irtenenak. Nolarebait jabetzen naiz or argitaratzen diran liburuetaz, astiro ordea. Emen ditut Ilias-ena, Hugo Wast-ena eta abar. Baina beluegi datozkit eskuartera iritziak idazteko.

Ez dakit nere bizibidea nola argituko dan emen, argitzen baldin bada euskeraz idaztera gogoz jarriko naiz.

Orrenbestez ar ezazu adiskide zahar onen agur beroena.