—94—

JOKIN ZAITEGIri

Guatemalara

Paris, 1952-XII-24

        Adiskide laztana:

        Zure gutunak bata bestearen ondoren, lerro lerro, etorri zitzaizkidan. Ez nizuke jakingo nere esker-ona nola adirazi, batez zure bigarren gutuna bear bezala eskartzeko. Egiten didazun eskeinia ez da bat ere zokoragarria eta nere bizikerari erdi-erditik datorkiona gainera. Bainan emen naukazu, oraindik erabakirik artzeke. Alare laster bai laster erabakiko dut eta nere erabakia azalduz idatziko dizut. Pozik zure ondora joango nintzake, zuri laguntzeko nai zenuken guzietan eta nere ustez, emen baino lan oso ta beteagoa egin nezake, naiz irakaskintzan naiz idazkintzan. Idazten didazunean, esaidazu arren, zer gai irakatsi bearko nituken zure Ikastetxean, engoitik gertutzen asi nadin. Badakizu, gutxi gora-bera, nik zer nezakean. Ez naiz burutsu, bainan aleginak egingo nituke edozertarako ondo gertutzeko. Beaz, esan eta ekingo diot.

        Idaz-lan ugari dauzkat zuretzat, andik eta emendik bilatuak. Bainan geiegi izaki, ezin netzaizuke egazkinez igorri, garestiegi aterako litzakit bada. Itsasoz bialtzen dizkitzut urrengo lantxoak:

Aldizkariak barna        Elentxu

Euskaldun Gudu-zalduntza baten beharkiaz        Mirande

Hanford-erako Ibilaldia        Saroyan-Insausti

Antzinako maitasun edesti bat        Saroyan-Insausti

Ibilaldietarako oarrak        Saroyan-Insausti

Euskerazko Pronomina Ofizialeak        Krutwig

1. «Euskalerriaren Adiskideak» eta Euskal Hiztegia        Zubero'tar Andoni

2. Otañoren omenez        Arrese'tar Emeteri'k

3. Txibestre Arrantzalea (poema)        Gametxo'tar Erroman

4. Erraondoko Azken Danbolinteroa        Kanpion-Mokoroa'tar J.

        Azkeneko lau lanak Donostiatik igorri zizkidan nere adiskide batek. Or ikusiko duzu zer argitara zenezaken aipatu lan oietatik. Nere Obidi-ren itzaurrea argitara zenezake ala baderitzazu. Miranderi ere galdetu nion alda ote zenezaken Ekklesia beste itz batez. Bereari eusten dio, baina alda dezakezu adibidez «bilkura» edo orren antzeko itzen batekin. Ez da aserretuko, eta samintzen bada neonek goxotuko dut. Ausartegi dabilkigu aspaldion, Krutwig etorri zaigunetik batez ere. Bainan gogoz ari da euskeraren onez eta barka bear diogu.

        Ez dakit ikusi duzunez Euzko Deyan sortu dudan eztabaida «Lizunkeria ta Euskera»ren inguruan. Erantzun aunitz izan ditut. Orain arte «Abandotarrarena» argitaratu dut. Oraingo zenbaki ontan Mirande ta Nemesio Etxanizen Jemein-i erantzunak argitarako ditut. Oso jakingarri bi-biak eta ederki idatziak. Nolarebait pizkortu nai nizun «Euskal-orriya» ori ere iritxi dut.

        Etxanizen Izeko aberatsa ta Irulearen negarra antzerkiak argitaratu dira liburu baten. Ementxe daukat, bainan oraindik ez dut ortaz eritzirik ondu. Idatziko dudaneko igorriko dizut. Poliki daude. Argitaratu da Hamlet ere, Ametzagarena, bainan ez dut oraindik ikusi. Lendakariari igorri diote ale bat. Oso txukun omen dago.

        Asi naiz Eneida euskeratzen. Lan luzea. Ez dakit noiz burutuko dudan. Lukreti-ren Izadiazkoaren zati batzuk ere itzulita dauzkat. Beaz ez naukazu lotan.

        Ene gabon eta urte berri oparik gorienak artu itzatzu adiskide. Beti ere zure berrien aiduru.

        (Zubero'tar Andima, Karmeldarra da Begoñan dagoena).