—239—

SANTI ONAINDIAri

Larreara

Caracas,1966-VIII-2

        Adiskide maitea:

        Egia esan zure gutunaren luzeritxian egon naz, baina pozik nago orain alako idazki ederra, igaro ilaren 4.koa alegia, eskuartean dudalarik. Eskerrik asko. Luzapena ezta alperrekoa izan. Neuk be oi baino geitxuago luzatu dot neure erantzuna, zure Euskadira itzuleraren zain, Bartzelonako osterearen ondorenean. Gutun onek etxian arkituko zaitula nik uste.

        Aurrera baino len, artuixuz zorionik beroenak Enearena bukatu dozulako; gitxik jakingo dabe, zuk eta nik lez, zelako lan aundia dan Bergiliren poema aundi ori euskeraltzea; zuk, zeuk bakarrik oso-osorik egin dozulako lan ori, nik barriz, olerkari aundi aren beste poematxo txikiak itzuli nitulako. Zorionak ba, Aita Onaindia, eta laster ikusiko al dogu irarrita Bergiliren lan aundi ori. Egia esan, ni beinipein erpai nago noiz ikusiko dodan gu bion liburu mardul ori irarrita, eta kezka betean nago guk nai baino geitxuago ez ete dan belutuko irarpen ori. Dana dala eneuke gura urte au igaro daiten agertu barik. Zuk orain aspaldi liburu orren izenatzaz neure eritxia eskatu zeunstan: Bergiliren Idazlan Osoak ala beste era batera ipiniko ete geutson liburu orri izena. Eztakit atsegin izango ete jatzun, baina nik olantxerik aldatuko neuke liburu-izena: Bergiliren Idazlanak Osorik. Dana dala, zeuk ikusi eta egokien deritxozuna ipini, eztago alde aundirik be ta bata besteagandik.

        Lobeagaz bialdu zeunstazan argazkiak artu nituen eta zerbait idatzi neutsulakoan nago beraietaz. Imanol Enbeitari itzi neutsotzan eta oindino ez daustaz biurtu, gainera asko, ilun samarrak dira eta ez dabe ondo urtengo liburuan eta argazki txarrez eginiko liburua baino, obeto izaten da bapere barik agertu. Gainera, auxe be esan biar dautsut: eztot uste Ekin-ekoek argitalduko dabenik liburu ori orain batez be Lopez Mendizabalek andik alde eginda gero. Neure adiskide batek erderazko liburu bat eukan an argitaratuteko, eta ezezkoa emon dautse, ori gero liburu bikainetan bikainena zala Unamuno eta Euskerari buruz. Ez ba arritu argitaratuten ezpadautse. Eskerrak «Kulixka» argitaratu dozuna bilduma polita. Ikusi dot baita gogoz irakurri be, eta olan zelanbait berbiztu dozu gure urretxindorraren gomuta, ain azturik euki dogun urretxindor maitiarena.

Jolasketa benetan izan jat atsegin eta ementxe nabil irakurri ta irakurri eztitan. Lan eder eta bearrezkoa egin dozu aurtxo maitientzat; ikastoletarako beintzet oinarririk bikainena jarri dozu, ea zuk jarri oinarri sendo orren inguruan, etxerik apain eta dotoreenak jaso al izango doguz. A zelako olerki, ipuin eta jolas bilduma ederra egin dozun... Antxe arkitu dot ia aztuta geukozan adiskide batzuen izenak Sistiyarena esate baterako... Eta Sistiya betiko aldendu jakun euskal-arlotik oraindino be bizi arren. Beste zenbaiten izenak be aintxen arkitu ditut, bainan batez be nere adiskide aundi zen Sistiyarenak inarrosi daust neure biotz au. Zorionak bada, Onaindia maitea; alako lan ederrak ari dozuzalako gure euskera errukarriaren alde.