—164—

JOKIN ZAITEGIri

Miarritzera

Caracas, 1957-VII-27

zuzenbide berria

Avenida de las Fuerzas Armadas

San Ramón a Crucesita

Edifº Andrea Doria-Apartº 14 Caracas

        Adiskide ona:

        Zure idazkia berantetsita nengoen, azkenean ordea eskuetara zitzaidan aldizkariaren azken zenbakiarekin batean. Banakoa ta eskutitza biak ederrak. Zerbait esan bear dizut ordea, an diodazun zure asmo berezi, bitxi obeto, orretaz. Ez duzu gero, orrelakorik egingo. Euskerak eta aberriak or bear zaitute zu, eta berrien berri Guatemalarako bidea artuko bazenu, zure naikari garaienak ukatu besterik ez zenuke egingo. Ondo dakit ez dala goxoa inolako laguntasun gabe or bakarrean jardutea. Nekegarrigo litzaizuke ordea emen gaindi aritzea, giro arrotzenean murgilduta. Ez, ez orrelakorik egin eta zaude or, zeure lekuan, aberrian, orixe baita zu bezelako gizonen egon tokia. Eta uste dudanez, obetuko zaizu inguratzen zaitun giroa; inork inun ez du urte-betean garaipen osorik lortu, eta zuk ere ez dezazula orrelakorik uste. Au ere begi aurrean ukan bear duzu; adinean aurrera xamartuz goaz, eta aleginak egin bear ditugu geure asmoak aurrera ateratzeko... eta or baino obeki ez dituzu inon ere aitzina eraman al izango. Beraz au ere kontuan artzekoa da. Gainera, Lendakariak beteko du noski eman zizun itza; eutsi xamarra izan arren, ez du noski jango. Eta nork daki Jakaren atsoak ere ondare ori gutxien uste danean jasoko ez ote duen? Beraz zaude or, eta aantzi ezazu betiko Guatemalako lurraldea. Orra labur esan nere eritzia burmuinetan darabiltzun asmo bakan ortaz.

        Emen inortxok ere ez zuela gure aldizkariaren alde ikusita azkenean [...]-sariak biltzeko aleginak egiten. Ortarako emengo arpidedunen errezibo guziak gertu ditut, bi urtetako sariak jasotzeko, 1956 eta 1957.ekoak. Eskerrak onuntza nintzanean arpide-zerrenda osoa ekarri nuela, bestela ezingo nuen lan ori burutu, emen etzeukaten bada, listatxo bat ere. Jakina, 10 dolar urteko kobratu bearrean, bost dolarna kobratuko dizkiet, eta pozik bi urteetarako amar dolarrok ordaintzen baditute. Guztiak ordaindu ezkero, diru-pilatxo polita jasoko duzu. Jaso-ala, diru garbiketa eta egin ditudan iruzpalau arpidedun berrien izen-zuzenbideak ere igorriko dizkitzut. Gezurra dirudi, baina azkenean neonek sudurra sartu bear izan dut egiteko ontan, emen inork ezer ere egiten etzuela ikusirik.

        Arantzazuko idazleen gandik ez duzu noski, laguntasun andirik izango. Aiek gabe ere badituzu aldizkarian idazle bikainak ugari; zertako ibili eskean? Bialtzen balin badizkitzute, ederki, eta ukatzen baldin badizkitzute beude... Arantzazukoen atzerakuntza noski, zuen artean erabili duzuten auzitik dator or nunbait... Noiz utziko ote ditugu euskaldunok liskarrak alde batera? Yakin ikusi eta irakurri ere dut. Idazleak gaztetxoak izan arren, bikainki ari dira euskal-garrez gainezka. Zer onik egingo dute noski. Eta noiz sartuko ote zaizkigu euskal bidean lekaide gazte oiek bezela, beste Euskalerriko ikastun sailak ere? Eliz gizonak gogoz ari zaizkigu, erri gizonak ordea beti muker, ezer gutxi eginaz. Ez nekien Berasaluzekin gertatua.

        Azken egun auetan oso lanpeturik ibili naiz etxe-aldaketa dala-ta. Ortan beintzat zerbait irabazi dut; orain egoitza polit, eroso ta atsegin batean bizi naiz, etxe berri-berria; aski geuk egin ditugula adeluak esatea. Nik uste giro obea izango dudala engoitik euskal-lanean aritzeko. Idazti berrien saila pozik artuko nuke nere kasa, baina berandutxo iristen zaizkit liburuok. Dana-dala, esaidazu eta pozik idatziko dizkitzut zenbait kritika aldizkarirako.

        Agur onen bestez, eta laister. Biotz on, adiskide, eta ekin gogoz euskal alorrari. Agindu euskeraren baitan adiskide duzun oni.