—234—

NEMESIO ETXANIZi

Donostiara

Caracas, 1966-II-15

        Adiskide:

        Eztira egun asko idazki bat egin nizula. Bear bada eskuartean izango duzu. Bost dolar igorri nizkitzun Zeruko Argiako aurtengo nere arpide-saria ordaintzeko. Arrezkero zure gutun atsegina eskuetara zait, eta ordaindu zenuela diostazu. Eztio ajolik, bost dolarrok zurekiko nere zorra ordaintzeko izango dira, eta kito. Arriturik nago nola oraindik Eganen ale bat ere agertu eztan urte guztian. Zer gertatzen zaio aldizkari orri? Zerbait esan zidan Mitxelenak orain aspaldi urtean ale bakarra edo aterako ote zuten.. Bear bada laister agertuko da.

        Bai gizona! Egin dezakezun gauzik onena zure lan guztiak, olerkiak ere bai, liburu batean argitaratzea izango litzake. Oraindixik diotsut liburu bikaina gertatuko dela zure mailako idazlerik ezpaitugu oraingo onetan euskaldunen artean. Bilduko al duzu nunbait ere ortarako dirua; berrogeita amabost mila pezeta ezta diru aundia or bizi diren ainbeste eta ainbeste aberats okiturentzat, euskotartzat euren buruak ditutenentzat... Baina gure zikoizkeria aundiegia da izan, batez ere euskerari laguntzeko. Ala ere, eskatu ezazu eta emango dizute baita ori baino geiago ere. Eta laister ikusiko al dugu zure liburu bikain ori. Nik ere alako zerbait egin nai nuke; or an, aldizkarietan eta barreiatuta dabiltzan nere idazlanak bildu eta liburu batean argitara eman. Orrela zerbait laguntasun emango diote gure euskera errukarri oni. Gainera, zenbait urte lenago. Oraintsu il zaigun Salbatore Mitxelena Aitak orixe egiteko esaten zidan, eta egin ere egingo dut, naizta nere txanpon guziak erreko baditut ere. Urteak aurrera dioazkigu eta Erio azkar dabil gure artean bere sega zorrotzegia erabiltzen... Eman dezaigula asti piskat gure lantxoak argitaratzeko bederik.

        Irakurri dut Txillardegiren liburu berria; arekin bat nator gauza askotan, eta arrazoi guziak ematen dizkiot euskera kontuan batez ere. Gure abertzale ergelak ez besteak, euskera ondatu besterik ez ziguten egin. Etzuten jakin aberri izkuntzari daukan garrantzarik ematen, eta oraindik ere eztute ikasi... Gazteok barriz euskera daukate gure aberriaren zimendutzat, eta ortan arrazoi guztia daukate euskotar izeneko orien aurka... Jakingo duzu zer nolako artikuluak agertu diran Tierra Vascan euskeraren aurka eta erderaren alde... Alderdi ortakoak eta bestelakoak erdera goraipatzen ari diranak alegia, espainiar ustel batzu besterik eztira, eta ez euskaldun, gainera gure arerioak bainon are arerioagoak eta kaltegarriagoak. Ni ez naiz eztabaida ortan sartu, nere burua eztudalako kakaztu nai.

        Gabonetan ere eztut Zaitegiren berririk izan. Total dago mintzul aspaldion gure parroku jauna. Txanponak metatzen nunbait... Nere etxekoak aurten Bilbora dioaz eta ni ere Donibanera joatea nai dute. Baliteke, beraz, Endaian edo elkar ikustea aurten. Aleginak egingo ditut beintzat, eta ia bazkai eder bat egiten dugun alkarrekin.

        Goraintziak aste-burukoei eta ondo izan.