—6—

JOKIN ZAITEGIri

Guatemalara

Paris, 1947-V-5

        Adiskide maite:

        Orain ilabete uri ontatik egin nizun idazkiaren erantzunik ez dut izan. Beraz, urduri xamar arkitzen naiz ori dalata. Aitatu eskutitz ori jaso izan baduzu nonbait, nere berrietaz jabetuko zinan noski. Baezpada ere, berriro nere goraberak jaulkitzera noakizu.

        Igara Epailaren 15.ean, Prankoren bidaliak, bazkal garaian, etxean aurkeztu zitzaizkidan ni atxilotzeko asmoz. Aiek ate nagusitik sar, ni ordea ate extutik atera. Baratzeko orma gainetik jauzi nintzan eta atertu bage Parisera arte.

        Aberriaren onerako, kanore ta garrantzi aundiko lana ixilpean egiten ari nintzan. Sareak Hispania oro barna edatuta neuzkaan, Euzkadin zer esanik ere ez. Urte batzu neramazkin ekin bide gogor ortan. Azkenez, aipatu garaian, salatzaileren baten eraginez edo, bila etorri zitzaizkidan. Jaunak ordea, odol-gorri aien menpean erortzerik etzun laketu. Alderantziz izatera, adiskide onen zantzurik etzendun egundo nabaituko. Etxekoak atsekabez utzi nitun, bainan dagoneko xuspertuta arkitzen dira, Prankoren atzaparretatik onik atera nintzalako.

        Nagon tokian ondo arkitzen naiz, erdi alperkerian. Gure gizonak, berriz ere erbestean lan zailen bat bizkarreratuko didatelazkoan nago. Nekatu xamar arkitzen naiz, alaz ere Aberriaren zorionak nere zoritxarrak eskatzen badu, burrukarako gertu naukazu beti ere.

        Alaz ere, Jokin maite, or nunbait neretzako tokirik arki bazeneza, esan egidazu lenbailen, neretzako atsegina litzake bada, zure gandik urbil bizitzea, zure euskera ta jakintzaren otapurrez biotz gose au asetzeko. Orrelako zorionik izango ote dut?

        Lendakari, Montzon ta beste zenbait agintariekin mintzatu naiz. Montzonekin, ala bear ere, euskel gaiak erabili nitun izgai. Bein ortara ezkero, Zaitegitzaz jardun bear. Zuk Epailaren 18.ean bidalitako eskutitza erakutsi nion ta poz-pozik irakurri zun. Gorasarrerik asko jo zitun Montzonek zurekiko: zu bezalako euskalaririk gutxi esan zidan.

        Bera ere or ari duzu lanean. Bigarren olerki bilduma Baionan dauka irarpean. Laister argitaratuko omen.

        Lhande ta Larrasket jaunek Etchahun zenaren olerkiak argitaratu ditute. Irakurri ditut eta poz-pozik bialiko nizkitzuke zeorrek ere ikus ditzatzun. Orrez gainera euskerazko zerbait ni emen nagon bitartean argitara badadi, gertu naukazu bialtzeko. Beraz agindu bildurrik bage.

        Orain lotsa alderdiratuta, eskabide bat egitera noakizu. Zure idaztirik ez dut oraindik irakurri. Bialdu izkidazu bada, arren, Sopokel, Olerkiak, Ebangeline t.a. Euzkadin gelditu banintz pila bat salduko nizun, orain ordea ez dakit nola antola zure idazti bikainak Aberrian edatzeko. Nere adiskide min bati, orraitio, idatzi diot zuk esan arauz zer edo zer egin ote diteken. Laister argitaratuko al duzu Bidaztien Eginak.

        Amaitzea noakizu idazki aspergarri au.

        Olabide jaunari ta aren arrebai goraintzirik beroenak.

        Zuk, berriz, adiskide, gure nabastarrearen ageririk sutsuenak jaso.

        Ene zuzenbidea: 5 Rue Quintin Bauchart - Paris (VIII).