—240—

JON MIRANDEri

Parisera

Caracas, 1966-IX-6

        Adiskide maitea:

        Eztakizu ondo zer nolako naigabe aundia ematen didan zuri esan bearrak nere orrerako asmoak aurten ere uts eman didatela nere gurari guzien aurka. Etsirik nengoen aurtengo udaran beintzat zuri agertu bat egiteko, eta alde batera utzi bear izan dut naikari eder ori ustegabeko oztopoak bidean eraiki zaizkidalako. Nere ibilaldia (joan-jina, alegia) kostatzen den erdia bainon gutxiagoan egiteko esperantza neukan nere esperantzak bainan ustel atera zaizkit, benetan ustelak. Datorren urtean, jainkoek ones, kosta-ala kosta joango naiz zu ikustera, eta bear bada emengo kriollo eta beltzak guztiak bazterrean utziko ditut betiko utzi ere. Aspertuta ere banago onenbeste kriollo, beltz, erdi beltz, judu eta euzko-abertzale salduen artean ere: ok-eginda alegia, eta bear bada zure aolkuari jarraituz komenturen batean izkutatuko naiz, zuk ongi diozunez, praide eta eliz-gizon guztiek ezpaitira L.Baionakoaren antzekoak. Izan ditut gainera, komentu-aldetik, eskeintza ederrak ere...

        Nere ilobak daguenilaren azkenetan atera ziren emendik eta ogeitalau ordu baino len bazkaltzen arkitzen ziran gure Elantxobeko etxean: postal bat igorri zidaten andik. Bi ilabete ango egonaldia luzatzekotan daude. Bear bada Paristik ere igaroko dira, bainan ontaz ez dadukat batere ziurtasunik, Inglaterrarako ustea zeukaten bada. Zure zuzenbidea igorriko diet baezpadan.

        Zure olerkia benetan zoragarria Gure olerkari askok bezela, zuk eztuzu saldu zeure olerkari izakera jatorra eta ederra, oraingo sozial-olerkari merkeen merkatalgoan. Zer nai duzu?... bainan nik egiazki era berri orri eztiot batere olerkoitasunik arkitzen, esanak esan eta erranak merran Arestiren olerkiek nere biotza otz eta motz uzten dute eta ederraren arnasik batere ez didate sortzen ene baitan. Antxinako molde igatuetan eraikia izan delako nere izpiritua? Eztut uste... beti izan bai naiz, gaztetandik, berrizaleen adoratzaile bai musikan baita olerkian ere... Baino gaurko sozial olerti elkor orrek ez nau batere asetzen, dodekafoni mingotz eta latzak asetzen enauen arabera. Ala ere olertiaren eta musikaren berritasun aunitz, maite ditut biziki maite izan ere. Eta zuk, adiskide, zer derizkiotzu? Zure iritzia jakin nai nuke gai ontaz.

        Esan nizun aldizkari berria agertzen baldin bada, zure olerki ederra ere agertuko da; ez dudarik egin ortaz. Esan nion gizon orri, aldizkaria egin gogo duenari alegia, ez gero nigana etortzeko olerkia argitaratzeko oztopoak ezarriaz. Eztut uste; naizta abertzalea izan naiko arima zabala ere da. Bainan, aren aldizkari ametsak beteko ote dira. Eztakit ba...

        Eta gutun au eten bearrik arkitzen naiz ene bulego-lagunak etortzen ari baitira eta bulegotik ari natzaizu, goizeko seiterdietan lerro inozo auek idazten. Barkatu adiskide maitea, ene gaurko laburtasunak etzaitut luzaroago esperantza alperretan eduki izan nai nere ibilaldia dela-ta. Orain badakizu, eta anartean, artu ezazu adiskide onen besarkadarik extu eta gartsuena.