—155—

JOKIN ZAITEGIri

Arrasatera

Caracas, 1956-X-11

        Adiskide mami:

        Zure gutuna baino egun batzu lenago E.-G. berria jaso nuen. Milesker andi igorpe bion alderako. Banako bikaina, eman diguzuna adiskide, alde guzitarik okitua. Zorionak bildu dituzun idazle garai eta trebeen gatik ere. Alde ortatik, ez du aldizkariak galduenik beintzat. Lafitteren Spinoza, orain arteko atalean beintzat, zoragarria duzu. Ez dakizu zer nolako joranez irakurri nuen. Villasanteren Añibarrorena ere, bete betea, aldizkari bat gaindegietara jasotzeko egoki-egokia. Zer esanik ez beste lanak ere... Olerti saila arkitu dizut apaltxoagoa... Bear bada, emengo giro onek olermena ito edo egin dit, eta orregatik ez ditut dastatu ahal izan bear nukean gogoz. Zure neurtitzak, xotil eta sakonak irudi zaizkit, «Sokrate eta Platon» berriz, philosophian igari dabilen idazle atin baten uzta jori ta umoa.Ez da makala gure euskerak sail ortan egin duen aurrerapena E.-G.ri eskerrak! Miranderen ipuia ere benetan miragarria! Itz batez, ez duela lengo anditasunik gure aldizkari maiteak galdu: orra egin nezaioken laudoriorik ozenena!

        Aldizkariarenak utzi-ta, goazen bestetara. Norbaitek esanda idazle-etxe bat sortzekotan zabiltzala banekien. Gainera lendik ere ezagun nuen zure asmo ori, ez nekin ordea buru-belarri ari zinanik asmo ori egi biurtzeko. Etxea ere, beraz, artuta daukazu nunbait. Izango dituzu oztopoak ere zere bidean, baina oztopo gabeko lan andirik ez da inoiz burutu izan mundu xistrin ontan. Jakin nai nituzke etxe berri ortarako antola dituzun arauen berri, nola ibiliko dan jakiteko. Diru andiak bearko dituzu, noski, eta ortik izango dituzu buruausterik nekagarrienak, ezer gutxi itxaro dezakezu bada gure aberatsetatik, aberats berrietatik batez ere. Badakit Euskal-batzarrerako diru geiena emen bildu zala, baina kostako zaizu zure asmoari eusteko dirurik biltzea... Eusko-aberats asko dago emen, diru apur batekin lagundu dezaketenak. Baina ez dakizu zer nolako kutiziz diruari eusten dioten... Ara ikaratuta gelditu naiz, urbil-urbiletik aien zekenkeria ikusi dudanean... Ni baino mila bider eutsiagoak dira, ori gero ni lander errukarri bat izan aien aldean. Beste nonbaitera zuzendu bearko dituzu zure eskariak... Dana dala ez etsi... eta aurrera beti amor emateke... Al dezakedanean ez dizut nere laguntzik ukatuko.

        Mingarri egin zait ordea, euskal-idazle-batzaren inguruan sortu duzuen ezta-baida. Zurearen ondoren, Irigoienek idatzi zidan eta benetan aserre dago gazte ori zuk batzarre artan esan zenizkionak gatik. Ez ote dira biguingarri eztabaidok? Jakina, ni ez nago gaituta eztabaida ortan naasteko, urte geiegitxo daramazkit bada Euskaditik landa. Dana dala, biok aleginak egin bearko zenitukete armoni gozoenera iristeko eta bazkun ori alik lasterren mamitzeko. Auxe bai argi dakust eta pozarren gainera. Euskalzaletasuna geituz doakigula gure aberri zaharrean. Eta zaletasun ori ez dedila, arren, epeldu autu goriegi batzu dirala bide... Eutsi ezaiozute zuen garrari inguru-mariak erre baino len. Orra biori dagizuedan eskaria!

        Ugalde bakan baizik ez dut emen ikusten... Etorri naizenetik bein baizik ez dut ikusi... Ala ere egingo diot zure mezua. Liburu biltzarrokoei ere esango diet, baina onena zeori Ametzagarengana zuzentzea izango litzake. Ez dut uste bazkun ortatik ezer iritxiko duzuten...

        Papera bukatu zait eta besterako uzten ditut geldi zaizkidan iruzkinak. Berri asko ditut oraindik zuri emateko, anartean nere euskal agurrik gartsuenak ar itzazu.