—200—

JOKIN ZAITEGIri

Miarritzera

Caracas, 1961-I-7

        Agur adiskide,

        Jaiak joan dira baina urtea asi berria da oraindik. Ar itzazu beraz urte ontarako nere zorion agur eta naikaririk beroenak. Izango al da joan zaigun bialikoa baino zoriontsuagoa eta gure asmoak aurrera ateratzeko oparoagoa. Ala bekio gure Jaun onari.

        Aurreragoko nere idazkian nere ezpiarren berri ematen nizun. Egia esan, ez dakit nola askatuko ditudan nere auzi larriak, batez ere lanaren auzia. Onexek batez ere atsekabetzen nau geien. Iru ilabete laster, lan gabe gelditu nintzala. Ala ere iraizeko lantxo bat arkitu nuen eta nekez bada ere, nere burua aurrera atera al izan dut iru ilabete auetan. Baina, derriorrean, lan iraunkor bat bilatu bear dut. Errexa ez izan ordea bilatzea bizi geran garai extu auetan. Dena den, ez ditut oraindik itxaropenak galdu. Baina gure adinera ezkero, neke egiten da, ortik zear lan eske ibiltzea. Egia diotsut; bidea zabal baldin banuke, lurralde auek bertan-bera utzi eta aberrira itzuliko nintzake pakean iltzeko baino ezpada ere. Bainan ezin itzuli ango agintariek lur-joten ez duten bitartean, eta ez dute ain arin lur-joko noski. Orra eman, nere barne-giroaren berri, larritasunez eta etsitasunez betea.

        Luzaro ez dela Arantzazuko praile gazteen gutun bat ukan dut; filosofi-edesti bat egin nai luketela eta Aristotelen saila neonek egingo ote nukenez. Erantzun diet. Ezezkorik ez diet eman baina argi esaten diet oso izango zaidala zaila olako lanik egitea sofia baino sopia maiteago dugun lurralde aspergarri onetan. Gainera nundik atera ortarako idaztiak? Eta batez ere, ortarako bear dan gogo-giro baketsu eta barea? Enbeitatar Kepak idazten zidan, baina jakin dudanez gazte au prantzizkotarren bazpatza uztekotan omen dago, mundura biurtzeko. Gainera beste gauza bat jakin dut, zuk ez diezu erantzun oraindik neri bezela egin dizuten eskabideari. Zer erabaki duzu?

        Aurreragoko nere gutunean ez nizun esan baina oraintxe diotsut: eres-azpiletarako euskerazko ikasbide bat egin dut oraingo Ameriketako ikasbide berrien ariora. Magnetoponean ere atera nuen, baina nere mintzo-bakarra aspergarri gertatzen da. Donostira eraman dute ikasbide ori an irarri eta eres-azpiletan ezarteko ustearekin. Ez dakit zertan gelditu diran, ez da bada onera oraindik itzuli eraman zuena. Ikasbide ortako itz-zerrenda bukatzen ari naiz egun auetan. Emengo nere adiskide batek eskatu zidan lan ori egiteko, eta poliki ordaindu dit gainera. Bera beintzat erabakita dago ikasbide ori len bait len argitaratzeko. Iru esale gutxienez bearko ditute eres-azpilak egiteko, emakumezko bat eta gizonezko bi. Emen ezin gentzakean ainbeste lagun aurkitu. Ortik atera dezakezu emengo euskaldunak, geienak beintzat, utsaren urrengoak gerala.

        Eta nola dijoa gure apaizen auzia? Aspaldion ez dut berririk izan ez Kerexetarenik ezta Nemexiorenik ere.Badakit, batez ere Bilboko epi-eskopua, gogor ari dana gure apaizen aurka. Ala ere Kerexetak izugarrizko gurenda iritxi du bere Barri Onarekin 6.000 ale saldu omen ditu eta irugarren argitalpena gertutzen ari omen da. Ez da makala.

        Orra esan gogo nizkitzunak oro. Zure berrien aiduru geratzen naiz. Ikusi dut Jesusen Biotzaren Dei berria. Poliki dago. Zuk zer derizkiozu? Urrengoan berri pozgarriak bidali al izango ai nizkitzu! Bitartean ar ezazu nere agurrik gartsuena.