—161—

JOKIN ZAITEGIri

Miarritzera

Caracas, 1957-V-8

        Adiskide ona:

        Zure azkeneko gutuna ta Euzko-Gogoa bi, ezin obeki eskuetara zaizkit egalontziz. Milesker, nerekiko ain arduratsu ari zeralako gure aldizkariaren azkurri goxorik palta ez dakidan.

        Nere gaurko gutuna ez da bear lukean bezin alaia izango. Badakizu zergatik. Zure inguruan gertatuak alako samintasun sakon bat zabaldu dute nere baitan. Inoiz ere ez nuen uste izango gure jenteak ain ergelki joka zitezkenik, arinkeriz, burugabez auzia bear zan dendunean lenago ezartzeke. Zurtuta geratu nintzan Etxanizen gutuna irakurtzerakoan. Andre sumindu batek jalkiak beste gabe aintzat artu-ta, Lendakariaganaino joko zuten bada. Nun da adiskidetasuna? Nun zintzotasuna? Eta nun kristautasuna? Irakurri duzu Etxanizi erantzun niona gauzak bear dan tokian ezarriz. Jaso-ala erantzun nion mingain zitalak ixiltzeko. Egia ezer baino maiteago dut, eta egia ori gezur guzien gainetik gailentzea nai dut kristau bati dagokionez.

        Etxanizena jasotzerakoan banekien Lendakaria etortzekoa zala eta eskutitz artan esaten nion, oartxo batean: «Lendakaria etortzekoa da. Auzi oni buruz ezer galdetzen badit, garbitasun guztiak emango dizkiot, galdetzen ezpadit, nik ere ezer ez diot aipatuko». Auxe zan biderik zintzoena nere ustez. Baina ona eldu-ala nerekin itz egin bear zula esan zidan. Etzan errexa egun auetako zalaparta ontan ortarako ater-une bat bilatzea. Bilatu genun eta iru ordu laurdenez zure auziari ekin nion, argi ta garbi. Pozik geratu zan Lendakaria eman nizkion berriekin argi ikusi bai zuen zure inguruan zabaldutakoak bezkeri zitalenak zirala. Esanak oro txosten batean biltzeko eskatu zidan, eta alaxe egin nuen. Nere informean bakoitza bere tokian ipini nuen esamesen iturriak obeki ezagutu zetzan. Egun bi geroago Lendakariak esan zidan: «informe ederra idatzi duzu alde orotarik eta poz-pozik nago». Egia esan, Lendakariak ez zien esamesa oriei sinisterik eman, alare nere txostenarekin asko poztu zan. Informeari eratxiki nion eskutitz labur batean beretzako bakarrik idatzia zala esaten nion, ez noski edonori erakustekoa ez dalako zeapen aunitz danen aotan erabiltzekoak ez diralako baizik. Beraz, adiskide, alderdi ortatik zaude lasai: Lendakariak zurekiko usterik bikainena dauka. Auxe ere esan nion: «Eutsi, Lendakari gure gizonari gezur guztien gainetik bear bearrekoa dugu-ta euskal alorrean». Eta alaxe egingo du noski baino noskiago.

        Bat ere ez nau arritu orain berriki sortu zaizun bakarzaletasunak. Ez dezazula zere burua ertsi, ordea. Ez. Ekiozu gogotik zeure lan eder orri esamesa ta kritika ero guztien gainetik. Ez kasurik egin prudenteen esanei, beraiek lanik egin ez eta besteena eragotzi nai duten oriena. Aurrera kementsuki ta gogoz. Gaurko odei beltzok laister argituko dira, askok uste baino lenago, eta orduan zurea izango da garai betea, bai orixe.

        Ementxe bialtzen dizut emengo jaiei buruz idatzi dudan kronika luze bat aldizkarian agertu dezazun, ala baderizkiozu. Ez dezatela uste, orain arte E.-G. idatzi ez dudalako, zure etsaiekin nagoala. Ala egin ezpadut betarik eta gogorik izan ez dudalako izan da, ez beste ezergatik. Gaurko kronikatik ikusiko duzu zer nolako otsandia izan duten emengo jaiok. Arnaska idatzi dut, eta uts ugaritxo isuri zaizkidalakoan nago. Zeorrek zuzenduko dituzu.

        Laster arte adiskide, eta agindu euskeraren baitan adiskide duzun oni.