—166—

YAKINen zuzendariari

Caracas, 1957-VIII-8

        Aba agurgarri:

        Egun batzu lenago eskuetara zitzaidan Yakin aldizkariaren irugarren banakoa. Adiskide batek utzita bigarrena irakurtzeko aukera izan nuen eta esan bearrik ez zenbaki biak joranez irentsi ditudanik, euskalzale bati dagokion poz-atseginez dardar. Gazteak datozkigu kantari, gazteak datozkigu aldarrikari euskeraren gandu belunak bere aots argi ta ozenez urratzen. Bizitz erpinera iritxita ama lurraren magal ospelera lerratzen asi geranok, nola poztu ez? Simeonenak joteko garaira ez naiz oraindik eldu, ala ere euskal-Mesia berri au eskuartean jaso dudanean alako «nunc dimittis»... eder bat oiuztatzeko gogo bizia sortu zait. Ez naiz geiegikeriz ari.

        Apaiz-gai gazteok gainera, irizpide zabalenaz jantzita datozkigu aldizkari ontan, bai gaiari buruz, baita izkerari dagokionetik ere. Ertsikeriak berez, urri eta txikitzera garamazki. Maiztxoegi ikusi izan dugu ori gure alorrean, bear baino maizago. Norbaitek Orixeren kutsua darila zuen euskerak jaurti dizute. Ez dakit irainez bota ote dizuten ordagotxo ori. Ala balitz gorapenik aundiena egin dizute gogoz-bestera badare. Euskal iturri gardenagorik ez duzute inun arkituko. Ogeitamar urtez gero euskal idazketan ari garenok iturri ortan eradan ditugu geure gogoak, eta zuek ere ola bearko dituzute. Jakina beste idazle argi zenbait ere ez dira astantzekoak zar eta berrien artean. Euskal-idazleok beti bear dugu irakur-minez. Izkera bat egiten ari gera, izkera bat jasotzen, eta ortarako danon aleginak dira onak. Norbaitek euskera eginda dagoela jardetsiko dit, bai eginda dago, zenbait gaietan ordea, araindik egiten, bear genukean zabaleran eta sakonera gure aberri-izkera erabili ez dugulako gaurdaino. Eta zuek Apaiz-gai azkarrok, aspalditik euskerarentzat opa ditugun gaindegiak iristen ari zerate. Zuen lan ori, uste baino len, Eliz amaren apaingarri bikainena gertatuko da, naiz-ta egungo eliz-agintariek besterik uste. Betik gorako aleginak maiz goitik berakoak baino eraginkorragoak izaten dira.

        Utsunetxo batzu arkitu ditut zuen lankideen artean; auxe bat: Bizkaiko apaizgairik ez dut ikusi idazleen artean. Ango Seminarioan ez ote dago euskaldunik? Bizkaitarra naizenez ori pentsatuta beste gabe negargura datorkit...

        Aurrera Yakin ari duzun bide ortatik eta zuen jarraibide argiaren erlantzera beste euskaldun gazte jakitunak ere pizkortuko al dira, bakoitzak bere sailean zuena bezelako lan ederra burututzeko.

        Guk emen gutxi egin dezakegu, bainan ez dizutegu gure laguntasunik ukatuko. Saiatuko naiz zuen aldizkarirako arpidedunak bilatzen, ez dakit zenbat, al ditudanak bai beintzat.

        Laister jasoko dituzute gure berriak. Anartean ameslari zar onen txalo beroenak ar izkitzute.