—189—

JOKIN ZAITEGIri

Miarritzera

Caracas, 1959-VII-20

        Adiskide ona:

        Aztu ere egin zait zure azken eskutitza noiz jaso nuen. Orra eldu baikoz idatzi zenidan eta nik, alper andi onek, ez nizun erantzun. Jakizu ala ere, ez zaitudala aztuta eduki, ez urrik emon be. Eta ahantzi ez zaitudalakoaren progantzan ementxe igortzen dizut, US $ 207,76 garbitasun eta guzi. Diruok, garbitasunetik ikus zenezakenez arpidedun zarren sarien gainera bigarren eta irugarrengo arpide berrien sariekin osotuta dago. Jakin dut gainera Intzak zuzen biali zizkizula El Tigren egin zituen arpidedunenak ere. Nik ez daukat oien listarik.

        Ene gardi gardostuz, Intza izenta bear zenuke zure aldizkarien ordezkari bakartzat emen. Ezertxo ere ez zenuke galduko, irabazi asko. Nere autarkia eman dizut. Datorren zenbakitik, beraz, Intzak agertu bear luke Euzko-Gogoan Venezuelako ordezkari bezela. Nik emen ditudan paper guziak eta zerrenda guziak emango dizkiot zer nork ordaindu duen jakin dezan eta zordunak ere jakin ditzan. Gauz oberik ezin dezakezu egin. Irizar ez da bat ere naigabetuko izentapen berri orrekin, beraz estutu gabe egin dezakezu dinotzudan aldaketa. Zeuk ikus.

        Luzaro ez dala Onaindia Aitak idatzi zidan Larreatik eta gainera Karmelen bilduma oso igorri. Benetan eskutitz atsegin eta jakingarria egin zidana! Bergiliren Larre-Kantak (Georgikon) itzultzeko eskatzen zidan bere Eneasena ta nere Unai-kantakin batera idazti mardul batean argitaratzeko. Emengo liburu-denda baten bitartez Parisera eskatu ditut Georgikok, eta artu bezin laster lanari ekingo diot, Onaindiaren asmo ederra lenbaitlen betetzeko. Gainera Bukolikak ere orraztu egingo ditut iluntasun batzuk argituz. Zer derizkiozu? Olerti deritzan aldizkaritxo bat argitaratzen asiko da laster, irarkolan daukala uste dut dagoneko, ain baita arrigarria Euzkadi barneko olerti-garatzea. Benetan langilea ta jatorra Onaindia auxe.

        Atzo argitaratu zan zazpigarren Irrintzi. Itxasoz bialtzen dizut. Euskal atala guztiz dator sakon ta bare inor mindu barik. Erdal atala, beti bezela, ori gero nekeak eta bost egin nituela biguntzeko, baina... Nik uste auxe izango dala azkeneko zenbakia. Oso nago nekatuta eta nere indar apurrak beste lan garaiagoetan erabili nai nituke ez politika arruntean... Eta gainera askoz atsegingarriagoa da beti ere baimenen bizitza ez-menena baino: ezak lana ta naigabea ekartzen ditu, baiak aldiz, patxara, irriparrea ta txera ona, naizta bin-bitartean aberria zilipurdika amilbera joan. Zertako estutu? Obe lasai lo egin. Ala ere irakur itzatzu arretaz «Eguzkiari Deika» eta «Odol-gabeko Matxinada» artikuluak, nere testamentuak. Esango didazu zer deritzazun.

        Nere garatzak oso dabilzkit txarto, eta mirakulu bat gertatu ezik, ez dute zuzenbiderik izango. Zer egin? Onena Silosen edo, donado sartu nere bizitz-ondarra Jaunari eskeintzeko mundutik urrun. Bazeneki zer nolako gogoa daukadan zulo batean sartuta bizitzeko?

        Irakurri dut Eganen Itun-Zar eta Berriaren kritika... (?) Zure aldizkarirako neuk ere ortaz idatzi nai nuke, baina indar gabe arkitzen naiz ezertarako. Solauni Santa Elenako memoriala ez dudala oraindik bukatu. Ene goraintzi minenak orko adiskide oneri, eta zuk ar ezazu adiskide onen besarkada bat.

        * Andonik, Lorek eta Irunek mila goraintzi. Aitortxuk ere bai. Ikasi du aita aita esaten eta oso dago mutiko ederra. Zure berrien aiduru.

        (Aurraitz gizajoa «Gran Sabana»n Jainkoaren eremuetan bizi da orain. Mila bidar damutu zaio ona etorria. Gaur gero oso izango da zaila aren berririk ukaitea. Ainbeste euskotar aberats ta ugazaba eta ez du inor ere arkitu eskua luzatuko zionik! «Vasco ayuda al Vasco» ez dira gure artean ain merke saltzen dituten gezur andi orietakoa! Ez diot oraindik erantzun Beg.-i. Laster egingo diot eskutitz bat. Agur).