—44—

JOKIN ZAITEGIri

Guatemalara

Paris, 1951-X-7

        Adiskide laztana:

        Eskerrik anei zeure urrutidatza dalata. Asi natzaizu antolaketan, bainan oraindik ez dut iritxi Guatemalakoaren baimenik, ala ere ez dut etsi. Zure eskutitzaren zai naukazu emengo ordezkaria nerera ekarteko. Ez dit uko biribilik eman, jakina, bainan oiek errezegi luzakor dituzu. Or ikusiko egun gitxi buru.

        Emen dizut ere azkeneko Euzko-Gogoa. Bikain dator eta ori ez diotsut nere idazlanak dakazkilako, baizik eta zuen lan borobil aberatsez jantzia datorrelako. Zure azalpenak mamitsuak, joriak. Ori bai aberastasuna gure euskerarena zure eskuetan. Orixenak ere, pozarren irakurri ditut, baita Etxanizen olerkitxoak ere. Itz batez esateko, bete-beteko zenbakia atera duzu.

        Arrezkero, lantxo batzu burutu ditut. Esan nizunez, Garriga Jaunari baimena eskatu nion bere idazlana euskeratuta Euzko-Gogoan argitaratzeko. Gaur ain zuzen ere, bere erantzuna artu dizut, onatx diona: «Gaurko ta betiko baimena dezu onelako jazoetan. Euzko-Gogoan argitaratzea ez ote aintza bat? Berdinean gabiltza ta berdina darabilgu, zuek zabalki, Boletinak gutxiagotu, zurtasunez, jakina. Irakurri det Guatemalako aldizkaria lenengo zenbakitik azkeneraino, ta bertan zure idazkai bikainak. Euzko-Gogoaren lan arrigarriak igali ederrak ekarriko dizkigu ezpai barik. Artan idazten dezuenok geure izkuntzaren eragile ta luzagotzaile onenak zerate.» Bilbotar euskeldun-berri izateko, naiko poliki idazten dizu Garrigak. Enizun uste.

        Orrez gainera, Salbatore Mitxelenak argitarazi duen Ama-Semeak Arantzazu'ko kondairan idazti berriaz iritzia igortzen dizut. Mitxelenak bere liburuaren ale bat eskeini zidan. Errirako idatzia eta batez ere poliki irarria. Zuk ere, adiskide, zure Bidalitzazkoa Zarautzen irarriazi bear zenuke merke ta egoki argitaratuko dizutelako. Labaienek edo zuzendu lezake irarpena. Gainera barnean izan ezkero, errexago zabalduko litzake zure liburu ederra, bai orixe.

        «Aldizkariak barna» ere bialtzen dizut. Bedatzi aldizkarien euskal arkibideak damazkit eraspentxoak ezarrita. Aurten berrogeitamar urte bete ditizu Euskaltzaleen Biltzarrak. Herriaz ari naizela eztenkada batzu botatzen dizkiet: gogorregi baderizkiezu, erauzi itzatzu eztenkadok. Baina egia esan, Biltzarre ori emen Parisen, adoregabeko ta buru arin zenbaitez antolatua duzu; lotsagarriena, berrogeitamar urte buruan, etxerik ere ez dute non koka. Eta amar mila euskaldun (lapurditar, xuberotar, baxenabartar) baino geiago dagoz, bakoitza bere kaxa batera ezin etorririk. Emengo biltzar buruak erdi-prantzestuak dituzu, neri egia esateko, nazka besterik ez didate ematen. Dana dala, eztenkada gogorregi baleritzazu, eradoki ta kitu.

        Giza-soinaz aurrentzako idaztiño bat egitekotan nabilkizu, bainan emen ez dizut ez Olabideren Giza-Soinarik, eztare Azkueren iztegirik. Beaz nola antola. Eskatu ditut barnera, baina ez dakit bialiko badizkidate. Badut ere beste asmorik, gauzen ikazkizunetaz, emen Prantzian aurrak erabili oi dituzten liburu orietako baten antzera euskeraz zerbait egiteko, beste euskal lanak albora utzi gabe. Asmotan jori, esango duzu nunbait, eginetan urri ordea. Eta egia diokezu.

        Agur adiskide eta lenbailen erantzuidazu arren.

        Besarkadarik sendoena zuretzat.