—15—

JOKIN ZAITEGIri

Guatemalara

Paris, 1950-VI-13

        Adiskide ona:

        Eskuartean ditut zure ostaroaren zazpikoa bai ere urrengoa, beraz bi-biak. Baita ere arainegun Epail-Jorrailei dagokien Euzko-Gogoa jaso nizun. Benetan banako irakurgarri eta ernegarria. Zure lan biak «Eliza nare» eta «Paul Atenain» biotz dardaraz irakurri nitun. Benetan sakon eta berriak; gure elertian inoiz gutxitan izaten dugu zori, orrelako aberaska gozoak ao-bete-betean jateko. Batez ere Akropoli eta Atenaiz dagizun elespena biziki atsegin izan zitzaidan. Amaiur-en lana ere, irarrita atseginago izan zait. Gure anbiolako itzulpena ere ez duzu bertanbera uztekoa; zure esku-ikutu eta orrazia oartu dizkiot. Orixeren olerkia zeru-sakonenean sortua esan diteke, Jainkoaren altzo-altzoan. Irakurriago eta atseginago egiten zait. Nere zorion-agurrik kartsuena jaso ezazu adiskide. Bide ortaz euskera aberastu, zarberritu ta pizkortu al izango dugu.

        Nerekiko Orixe aundiak jalkiak benetako poza eman didate: Zer dala-ta ukatuko dut? Ez dut ainbesterik merezi, bainan aurrerantzean aleginak eta lerrenak egingo ditut arek esanak ustel atera ez ditezen. Mila goraintzi emanen dizkiozu niketz, eta oraindik gogoan dudala esango diozu Tudelan, latin-norlenka baten, amaika urte nitun, berak egin galdera: «¿Qué quiere decir Ibi?». «Allí», nere erdera motelez eta dardara gorritan erantzun nion. Gomutan duke, bear bada.

        Idazki oni eraitxikita bialtzen dizut Bach ereslariaz egin dudan lantxoaren zati bat: amalau orrialde. Beste zatia geroago bialduko dizut, ia amaituta dut, eta onek ainbat orrialde izango ditu. Agian luzeegi jardun naizela derizkiokezu ereslari andi orretzaz. Lan oso xamarra antolatu nai izan dizut, euskera lenengo aldiz sail ortan sartu dugun ezkeroz. Bainan erdiska baizik ez dizut iritxi nere elburua. Elkor eta urri deritzat. Zure ta Orixen aberastasun eta jakintza banitu, gorasarre obeagorik egingo zion gure euskera maiteak. Dena dela, or ikus eta moztu-bearrak errukigabe moztu ta inausi. Lan geiago ere badarabilzkit eskuartean, botanikaz eta elertiaz batez ere. Inoiz paper artetik burua jasoko al dute.

        Egin duzun lan-goragarriena, adiskide, Orixe zure ondoratzea noski-baino noskiago. Zuekin Euzko-Gogoak zeruko izarrak ere atxikiko ditu, eta errebistetan ikusgarriena izatera iritxiko da. Gogoz eutsi bear diogu itzalpera erori ez dadin. Ain zuzen ere, Amerika-Erkalderriak barna bizi diren milaka euskaldunen fitxeroaren jabe nauzu. Ortik ezer onik iritxi al izan ezkero gure aldizkariarentzat gerturik naukazu neurez alegin oro egiteko.

        Berri aundi bat eman bear dizut. Euskaldunak Poema irarrita dago eta ene begiz ikusi dut, oraindik salgai jarri ezbadute ere. Lareun orrialdeko liburu dotorea duzu, ederki irarria. Ale bi eskatu ditut, bata zuri bialtzeko bestea neretzako. Jaso-ala bialduko dizut.

        Agur adiskide laztana eta laister arte.

        Zure beti ere.