—34—

JOKIN ZAITEGIri

Guatemalara

Paris, 1951-VI-29

        (Idazki onek atzerapena izan du. Atzo, Garagarrilak 28, etxetik iraitzi gaituzte, oldarrez. Beraz Pranko jabetu da gure ondasunekin. Aurrerantzean, idazkazaleko zuzenbidera idatzi. Agur).

        Adiskide ona:

        Mila ta mila esker zure idazki ederraren onerako. Pozik irakurri nizun, eta pozago zure eskaintza biozkorra jaso. Ez dakit gerokoak zer izango diran, bainan garaiz gogoeta jarri naiz. Emengo gertakariak izigarriak dituzu; laister etxea uxtu bearko dugu Francok erasota. Zama garratzak egin dizkio Prantziko Jaurlaritzari. Gure etxea ematen ezpadiote, Españan dauden Prantzi-ikastola oro itxi-eraziko omen ditu. Ez ori bakarrik, baita laterri arteko saldu-erosketan ere inausi gogorrak egingo omen. Beaz prantzitarrok gu lenbailen iraiztera beartu nai ditu. Bainan okerrik nagusi eta deitoragarriena, gure gizonena izan duzu. Etxe auzi au, ederki eta aisa bere garaian konpondu zitekean, orain lau urte, baina zabar eta baldar ibiliak dituzute, eta orain ondoren auek jaso dituzte. Lotsagarria ta alkegarria benetan.

        Pozik zuen artera aldatuko nintzake, oraindik zer onik lurralde orietan burutu dezakedala derizkiot. Bainan min ere ematen dit Euzkaditik geiago urrundu bearrak. Ala ere, gertu naukazu edozertarako, emen aurrerapiderik ikusten ezpadut. Paperak antolatzen asia nauzu, zer gerta ere.

        Miranderen erantzupena igortzen dizut. Ikusi dezakezunez eskutitz biziki polit eta atsegina zuzentzen dizu elertilari ospetsu onek. Igandez izan nintzen berarekin, beti bezala euskeraz eta euskal gaietaz jardun genun. Asmo ederrik badizugu. Olerkitxo bi eman zizkidan ingeleratik biurtuta. Ez du nai E.-G.n argitaratzerik, baimena bearko litzatekeelako ortarako. Kantagaik biak, eta ederki itzuliak. Max Groby'ren eres-gurpila erosi ezazu kanta oiekin eta or ikusiko duzu zeinen ederki abestu ditezken. Beste zenbait lantxo ere eskuartean badarabilzki.

        Nik ba ditut iru edo lau artikulu eginak. Laister igorriko dizkitzut. Dagoneko or izango duzu nere botanikatxoa. Beste lan sakon batean murgiltzekotan nabilkizu, zeri oratu ez dakidala nabil ordea.

        Lenago esan nizula uste dut, bainan bioa berriz ere. Olabide zenaren goratsarrez, E.-G.ren banako oso bat egin bearko genuke. Il zan eta aren oroimenik ez dizu inortxok jaso. Nik uste E.-G.koak aren ondare aberatsaren jabe gaituzula, eta inork baino len goratsarre ori opa bear geniokela. Lagundiaren zenbait makur ere, euskal bidean, astindu al izango genituke bide nabar. Bestalde, aren idazlanak ez daude osorik jesulagunen eskuetan. Erdiak, gutxienik, nere adiskide Mitxelenatar Alberta Apaizak dauzka, Oyartzabalek, utzita. Ez dizkio inortxori emango, guri bai ordea, Ormaetxeak ala eskatzen badio. Gainera Toulouseratzeko gertu dago, Mathieu Gotzaiaren idazki batekin, ango Jesulagunei Olabiden lanen berri eskatzeko. Nik uste, oindixek asi bear genukela banako eder bat antolatzen. Mugatu itzazu zuk lanak, idazle bakoitzarentzat Olabiden inguru, ta gauz eder bat egingo dugu noski baino noskiago. Galdetu ezaiozu Orixeri zer deritzaion. Asmokide izango da noski ua ere. Bear du Olabide zanaren oroimenak itzal aundiago.

        Pen-bilkura, erdi ilik, etxe ontako goraberak diralata. Emen ezarri nun idazkaritza, bainan aurrerantzean ez naiz ausartzen zuzenbide au erabiltzen. Zuen artean gotortu bearko dugu bilkura au ere. Onela ezin gindezke ibili, ardi galduak antzo deslai.

        Agur, adiskide maite, eta nere goraintzi gartsuenak Orixe ta Zugaditarrai.

        Zurea beti