Aktorearen bi lurrak / zoruak

Beharrezkoa da aktoreak bizitzan zehar landu behar dituen bi hitz hauek bere ofizioan txertatzea, azalean tatuatzea: alde batetik, behaketa edo obserbazioa, eta bestetik, sena.

1. Behaketa edo obserbazioa

Gure sormen iturria bizitzatik dator, nondik ba bestela? Aktoreak bizitzari erreparatu behar dio. Bizitzari begiratu, izadiari eta izakiari. Natura sentitu. Jakin-mina funtsezkoa da gure ofizioan. Gauzek, gertaerarik txikienek ere harritu behar gaituzte. Indiferentziarekin bizitzeak ez garamatza inora. Iturburu agorrezina da bizitza, eta bertatik edan behar dugu. Beti egon behar da su bat, zerbait piztu egiten gaituena, eta hari horri tira behar diogu. Eta bidea egin, iparrorratzik gabe, norabidea aurkitu arte. Sustraiak ezarri. Sorkuntza amaigabea da. Eta horrek eragiten duen bizipoza sekulakoa.

      Pertsonak, jendea, begiratu, nola hitz egiten duten, nola mugitzen diren, zeintzuk diren beraien azturak. Gure ingurunea nolakoa den erreparatu, inguratzen gaituenari so egin. Bizi garen gizartea nolakoa den ikusi, aztertu. Begia jarri. Adi egon. Artista ezberdinen lanak ikusi. Irakurri. Musika entzun. Zarata entzun. Isiltasuna entzun. Dena xurgatu, hartu, bizitzatik edan. Pentsamendu kritikoa eraiki. Deseraiki. Eta sortu!

2. Sena

Sorkuntzaren bidean intuizioa lagun izatea beharrezkoa da. Instintuari kasu egitea garrantzitsua da. Berezkoa izan daiteke, baina konfiantza eta beste gauza asko lantzen diren moduan, sena ere landu egiten da. Egiteko zauden horri, gertatzeko dagoen horri, arreta berezia jarri behar zaio, eta horretarako bost zentzumenak irekita egon behar dira.

      Gure ofizioan, oholtza gainean gaudenean, dena arrapaladan doa. Egia da mekanika bat sortzen dugula, baina mekanika horretan ez badiogu senari lekurik uzten, hutsala izango da gure lana. Intuizioa harrapatu egiten da. Sentitu, bizi. Arriskuak hartu behar dira. Bulkadari segi. Egoerak asimilatzeko, aurreikusteko, gaitasuna landu behar da. Datorrenari konfiantza eman. Barnean bakoitzak duen talentuan sinetsi. Eta elikatu. Eta sorkuntzaren magiari heldu.