Moldaketa

Eszena bati aurre egin behar diozunean, eszena bakoitzak egoera ezberdinak planteatzen ditu, eta egoera horiek bizi ahal izateko aktoreok moldaketak egiten ditugu. Adibidez, pertsonaiak inbidia sentitzen du, eta guk gure bizitzan antzerako egoerak bizi izan ditugunez, esperientzia hori bizitzea zer den badakigunez, bada moldatu egiten dugu. Gure esperientziatik pasatu den emozio edota bizipen bat pertsonaiaren dimentsiora pasatzen dugu, analogia bat eginez, moldaketa bat.

      Beste adibide bat jarriko dut: William Shakespeareren Hamleten hasierako eszena bat hartuz. Hamlet Danimarkako printzeari aita errege hilaren errainua edo arima agertzen zaio Elsinor gazteluan. Hark esaten dio Claudius-ek, Hamleten aitaren anaiak, hilarazi zuela, emaztetzat hartu zuen Gertrude (Hamleten ama) erreginarekin elkar hartuta. Aita erregeak mendekua eskatzen dio bere seme Hamleti.

      Ertz asko dituen eszena bat da, baina eszena honetan agertzen diren sentimenduak, guztiok bizi izan ditugu beste marko edota egoera batean, eta uler ditzakegu. Adibidez, hasieran Hamletek bere aitaren mamua ikusterakoan harridura eta beldur puntu bat senti dezake. Ba, guri dagokigu, aktore bezala, eszena horretara egokitzea, imajinatzea antzeko egoera bat, non beldurra eta harridura sentitu dugun. Gero, aitak gertatutakoa kontatzen dionean, traizioaz hitz egiten ari gara. Beraz, gure bizitzan traizionatuak sentitu garen kapitulu bat irudika dezakegu. Sentipen horrekin konektatu. Eta bukatzeko, Hamleten aitaren partetik mendeku eskaera dago. Bada, orduan, pentsatu beharko genuke gure bizitzan bizitako antzeko egoera baten, pertsona batek beste norbait mendekatzeko eskatu izan diguten egoera bat. Horrela identifika gaitezke Hamlet pertsonaiarekin eta konkretuki eszenan gertatzen den egoerarekin. Gure aktore lana, pertsonaiaren fikziozko bizipen horiek sinesgarri egitea da, eta publikoari komunikatzea.

      Laburbilduz, aktoreak eszenan bizitzen dituen sentimendu analogoak aurki ditzake bizitza errealean. Aktoreak, bizi izandako egoera erreal bat fikziozko egoera batera eramaten du, moldaketa bat eginez.