Dilatazioa

Dilatazioa da aktore batek oholtza gainean lortzen duen energia-kontzentrazio mailaren ondorioz lortzen den efektua. Efektu honekin aktoreak bere gorputza fisikoki zabaltzea lortzen du, anplifikatzea nolabait esatearren.

      Sarritan entzuten dugu: aktore horrek izugarrizko presentzia dauka eszenan. Baina zer ari gara esaten? Bada, bere gorputza egoera ezohiko batean dagoela. Energia fluxu batzuk ari dira mugitzen bere gorputzean eta gogoan. Aktoreak tentsio eta indar metaketa batzuk sorrarazten ditu eszenan presentzia bat lortzeko. Bere gorputza eta gogoa dilatatuz.

      Horregatik garrantzitsua da aktoreak eszenara irten aurretik muskulu guztiak ondo erlaxatzea. Luzaketen bidez gorputza berotzea. Yogako asana batzuk egitea izan daiteke aukera bat. Ahots beroketa egitea ere garrantzitsua da, ahots-kordak nasaitzeko.

      Gaur egun antzokietan teknologiaren erabilera handia da. Antzoki batean ez dago erabateko isiltasunik. Fokuek, soinu ekipamenduek, dimmerrak… guztiak ia hauteman ezin dugun zarata bat ateratzen du. Gu, aktoreak horren gainetik egon behar gara. Zarata edo soinu horren gainetik anplifikatu behar gara. Egia da, gure gorputzak ere muga batzuk dituela, baina anplifikatzeko edo dilatatzeko kontzientzia hori izatea garrantzitsua da.

      Bestalde, ez da berdina, bi metrora duzun ikuslea edota hogei metrora dagoena. Ezinbestean zure gorputzak eta ahotsak beste modu batean jokatu behar dute. Zure barne su hori proiektatu behar da, zabaldu, leku guztietara iristeko, bigarren ilaran dagoen eta hogeigarren ilaran dagoen ikusleak, berdina ikusi eta sentitu ahal izateko.