Aktore dantzaria

Ekialdeko antzerki tradizioetan ez da bereizketarik egiten aktorearen eta dantzariaren artean. Batzuetan dena da bat. Kathakalian, adibidez, aktoreak pertsonaiak jokatzen ditu eta, aldi berean, jokoaren barruan dantzatzen du.

      Argi dago, aktoreak zenbat eta baliabide gehiago izan, zenbat eta tresna gehiago maneiatu, trebeagoa izango da jokoan. Erritmoa eta musika ongi menderatzea, entzumena elikatzea eta zenestesiari arreta jartzea, balore garrantzitsuak dira ofizioaren ikasketan.

      Aktoreak, bere esentzian, eszenan geldirik egonda ere, barnean dantza bat izan behar du. Egon daiteke geldi, adibidez, bakarrizketa bat esanez. Baina geldi egote horretan ez badago dantzarik, jokoak ez du deus balio. Dantza hori, ahotsaren bidez ere eman daiteke: bolumenean, proiekzioan, intentzioetan, isilunetan. Eta esan bezala, gorputzaren gelditasunean.

      Dantzari on baten atzean aktore on bat dago. Aktore on baten atzean dantzari on bat dago.