Jarduera / aktibitatea

Aktoreak pertsonaiarendako jarduera ezberdinak bilatu behar ditu. Jarduera edo aktibitate horiek gorputza eta burua aktibatzen dute, eta ez zara testuari itsatsita geratzen. Bizi bat dago eszenan.

      Esaten duzunak eta egiten duzunak ez dute zertan bat egin. Gainera, kontrako ekintzak badira, hobe. Zerbait jatea, sagar bat adibidez. Eta jaten duzun bitartean, zure azken amesgaiztoa kontatzen duzu. Jarduera bat izateak, kontakizunari beste teatro-jite bat ekarriko dio.

      Adibidez, zure jarduera margo handi bat egitea da. Pintzelak eta pinturak dituzu, pareta batean oihal handi bat, eta margotzeari ekiten diozu. Aktibitatea beti, zenbat eta konkretuagoa, hobe! Pintaketan ari zaren bitartean zure txikitako pasadizo bortitz eta ahaztezin bat kontatzen diozu lagunari. Kontakizunari beste elementu bat gehitzen diozu, ekintza bat, jarduera bat, eta jarduera horrek testuari harrapatuta egotetik libratzen zaitu. Horrela, kontatzen ari zarenak beste leku, seguruenik interesgarriago batera eramango zaitu.