Nandikeshvararen bertsoa

Egun batez, nire harridurarako, nire Kalamandalam guru Haridasanek sloka edo bertso hauek kantatu zizkidan.

Yatho Hasta thatho Drishti,

Yatho Drishti thatho Manah,

Yatho Manah thatho Bhaava,

Yatho Bhaava, thatho Rasa.

Eskuak luzatzen diren lekurantz zuzendu ohi dira begiak,

Begirada jartzen den lekurantz gogoa,

Gogoa jartzen den lekuan jaiotzen da espresioa,

Eta espresioa dagoen lekuan sortzen da emozioa.

Nandikeshvara (K.a. V.-IV. mendea) antzinako Indiako arte eszenikoen teoriko handia izan zen. Abhinaya Darpana (Keinuen ispilua) liburua idatzi zuen. Indiako antzerki, dantza eta musikaren inguruko gogoeta hauek, gizaldiz gizaldi transmititu diren jakintzak dira. Lehen aldiz, bertso hauek entzun nituenean, transmisioaren garrantziaz ohartu nintzen. Eta nola ez, bertso horietan ezkutatzen zen jakinduriak erabat harrapatu ninduen. Indiako Abhinayari buruzko ikasketa zoragarriak.