Legaleon-T eta L’Alakran

Espe Lopez Legaleon Teatroko iruindar aktorearekin Babiloniako loreak obran lan egiteko aukera izan nuen. Aurretik, Espek Antzerkiolaren azkeneko Stage Nazioartekoan irakasle gisa jardun zuen. Nahiz eta ordura arte aktore lanean bestelako moldeetan aritu izan, oso ondo jokatu zuen Nikosiaren papera. Legaleoneko aktoreek beti jokatu izan dute pertsonaia eta pertsonaren artean dagoen hari finarekin. Ez dute pertsonaiaren beharrik, soberan dago, eurak aktoreak/pertsonak dira oholtza gainean daudenak, euren amorru, hauskortasun, maitasun eta gauzaez guztiarekin.

      Legaleon-T antzerki konpainia 1986an sortu zuten Irunen Ana Perez, Oscar Gomez, Antton Anduaga, Edurne Rodriguez eta Espe Lopezek. Taldeak antzerki lan esanguratsuak egin zituen eta gure herriko paisaia teatralean antzerki alternatiboaren bidea ireki zutela esan daiteke. El silencio de las Xygulas, Mujeres al rojo vivo edo Ubú izan ziren euren lan batzuk. Rakel Marin Ezpeleta aktore gasteiztarrak idatzi zuen Antzerkiola Imaginarioa eta Legaleon-T taldeei buruzko unibertsitate lana. 2020an argitaratu zen Genealogía, procesos y consecuencias en el teatro experimental del cambio de milenio. Euskadi como espejo titulupean.

      Espe eta Oscar sarritan etorri izan dira gure lanak ikustera, nik ere euren lanak ikusi izan ditudan bezala. Beti izan dugu elkarrekiko konplizitate, miresmen eta errespetu hori. Anarekin baita ere. Urte batzuk geroago, Hendaiara etorri ziren Zazpi senideko antzerkia ikustera, adibidez, eta emanaldiaren ondoren Esperekin hitz egiten Oscarri sari potolo bat eman ziotela komentatu zidan. Oscar Gomez Irungo L’Alakran taldeko zuzendariari Suitzako Kultura Ministerioak Antzerki Sari Nazionala eman zion bere ibilbideagatik.

      Hauek ere ez dira inoiz beren herrian profeta izan. Agian, pailazoak eta bufoiak bai!