Antzerki unibertsitarioa

Karlos Panerak zuzentzen zituen Leioan ehuko antzerki tailerrak. Urtero, taldea osatzeko, casting bat egitea proposatzen zuen. 2002ko hondarretan, castinga pasatu eta, aukeraketa egin ondoren, taldea osatu eta astero unibertsitatera joaten hasi nintzen. Areto nagusian egiten genituen entseguak. Talde hartan zegoen Irantzu Azpeitia, egun Artedramako lankidea dena.

      Beste herrialde eta garai batzuetan gertatu bezala, antzerki unibertsitario indartsu eta eraginkorra egitea amesten hasi nintzen. Arte Ederretako jendearekin elkartu eta eszenografiak eraiki, material grafikoak egin, dramaturgia berriak sortzeko idazleak aurkitu… baina dena oso sakabanatua ikusten nuen, antzerkirako gogo gutxi eta zuzendaritzaren partetik interes falta handia. Bada, immobilismo horrek zerbait xumeagoa egitera eraman ninduen.

      Antzerkiolako kideei laguntza eskatu nien eta horrela ¡Hoy celebramos! deitu zen antzezlana egin genuen. Unai Garatek eta Jon Gerediagak idatzi zuten, Oier Ituarteren argiak, Aritz Merinoren eszenografiak eta Azegiñe Urigoitiaren jantziek osatu zuten talde artistikoa.

      Egindakoaz pozik gelditu nintzen; arrakasta lortu genuen publikoaren aldetik eta aktoreen joko maila ona izan zen. Hala ere, unibertsitateko dinamikak ez ninduen asebete eta ez nion etorkizun argirik ikusi. Ez behintzat nik amesten nuen etorkizunik. Panerak hurrengo urtean ez ninduen berriro deitu. Hainbat hobe!