Furgoneta I

Nire herrian inoiz ez da antzokirik egon, eta beti Jai Alai Unibertsitatearen frontoian, “Uni”an, egin izan dira emanaldiak.

      Herriz Herri programaren barruan, Geroa antzerki taldearen Grand Place izan zen ikusi nuen lehen antzezlana. 1987a zen. Txunditurik atera nintzen. Frontoian izan zen eta publikoak inguratzen zuen eszenatokia: han zegoen isiltasuna gogoratzen dut. Gorputz biluziez gogoratzen naiz. Bukatu zutenean dena nola biltzen zuten ikustea ere harrigarria iruditu zitzaidan. Nola dena furgonetara sartzen zuten. Aktore haiek frontoian utzitako energiak eta sortutako magiak harrapatu ninduten, eta are gehiago jarraian furgonetan eraikitako guztia sartzen ari zirela ikusteak. Ametsak, emozioak, ahotsak, argiak, izerdia… egindakoa desegiten.

      Antzerkia bidaia bat da. Eta bidaia hori normalean furgonetan egiten da.