DANTZARIA

Menderatzen dituzu hezur, pausaje, gihar,

zure zerbitzura hatz, belaun eta ukondo;

malgutasun petoa, bestondoak bestondo:

munduan zu bakarra da aski, eta bi, lar.

Gorputza beti zure esanetara dago;

zure esklabo eta zerbitzari da; zu, jabe.

Obeditzen dizu leun, txintik atera gabe.

Mami den maitaleak, zelan esan akabo?

Diziplina: zartailu, plazer, tortura gailu.

Gaur laztanaren tenore; bihar zakar, mailu:

“Elkar birrindu dugu biok, bakean gaude”.

Jo zenuen gorputza; orain zu bere laute.

Bera diktadorea eta zu jopu ihar:

jakina da, nor den noren zerbitzura bihar.