(NIRE) MEMORIA TXARRA

Hain txarra ez balitz, ikasiko nuke buruz

idazten ari naizen hauxe, eta hurrengoa,

berdin. Aldakorra dut buruko arragoa,

ordea; ez da malenkoniarako, ez blues

nostalgikotarako dago, ene aburuz.

Ihes-itoginez nahi baino beteagoa,

leitutakoa irakurrieran badoa:

alfer-alferrik nabil azpimarra ala gurutz.

Ahanztura orekatzeko daukat sormena,

eta beti lehen aldia balitz bezala

zuri entzundakoaz gozatzeko ahalmena.

Errekasto banintz, memoria likidoa;

ulermen banintz, lurmendutako elurmena.

Lurrundu ahala txunditu, horra hor gakoa.