OREKARIA

Besoak gurutze eta bizkarra zuzena,

argazki garrantzitsu baterako jarria

balego bezala, kontzentrazio handia

duela nabarmen; eta aldia, ez lehena.

Treba ote daiteke ez erortzeko sena?

Nola menpera alanbre peko amildegia?

Zeruaren zama nahikoa ez balitz, ia

arrakala haztatuz dabil sokan barrena.

Arnasari eutsirik doa tentuz, xuabe,

zehaztasuna maite duen orekaria

balitz bezala gu guztion dardaren jabe.

Ballet-eko ibilera, pertikaren mirabe;

irakurketa honetan ez galdu haria:

pitzadurak laztan, barrura erori gabe.