OLERKARIA

Eskuak kokospe eta bizkarra okerra,

argazki garrantzitsu baterako jarria

balego bezala, kontzentrazio handia

duela nabarmen; eta aldia, ez lehena.

Treba ote daiteke ez erortzeko sena?

Nola menpera alanbre peko amildegia?

Zeruaren zama nahikoa ez balitz, ia

arrakala haztatuz dabil orrian barrena.

Arnasari eutsirik doa tentuz, xuabe,

zehaztasuna maite duen olerkaria

balitz bezala gu guztion dardaren jabe.

Heren bat irudimen, oroitzaren mirabe:

izkiriatze honetan ez galdu haria:

pitzadurak laztan, barrura erori gabe.