URTEBETETZEA

Hondarra bihitik bereizten ditugun lanak!

Txorimaloak lastoz garai baten bezala,

barruki hitsez gainezkatzen dira oihala,

tiradera eta armairu pipiak janak.

Intxaur-oskolduz doaz ukondo leun-aranak.

Nola liburuekin makurtzen den apala,

bizkarra gezi bako arku da berehala;

esku-beteka zakutu gaitu betelanak.

Trukean, gurea ei da hitzaren zehatza.

Kandelak itzaltzeko birikak ongi puztu

—tarta-suhiltzaile gara urteekin, antza—.

Zergatik ba, bete ordez, urteak ez hustu?

Plater biak irauliz, orekatu balantza:

alde banatan, seina limoi-erdi zukutu.