SIESTA

Bakarrik egin duzu, hala egin nahi ezta;

mundutik sator-zulora erretiratzeko

sofan oskoldu eta zirkuitu-laburtzeko

moduko koartada fina besterik ez da

kixkali aurreko itzalaldiaren festa.

Udan sargoria arintzeko nola etxeko

zirrituetan barna korrontea sortzeko

ate-leihoak aireztatzean duzun kezka,

berdin dagizu katuarena, bertan goxo

arratsa partituz, izan uda izan negu.

Aharrausia da asperkeriaren defentsa.

Siesta, doike, lo-aldi luzearen entsegu,

baldin esnatzekotan garaiz eta airoso:

ametsik eza bera, arnasarentzat sosegu.