SOLEMNITATE APUR BAT

Solemnitate apur batek ez dakar kalterik;

neurri klasikoak bere du kopeta aparte

samar jartzea poema irakur bitarte,

horrek ez du esan nahi papagaiak garenik.

Esentzia dugu ukitzen, noiz zuk, noiz nik,

irakurri ditugunez Camus eta Sartre.

Txantxa friboloari ukatu gabe parte

inportante bat, pentsa ezazu hau lehenik:

zer, errimaren kortsea opari balitz?

Bada deus errenditu ezin daitekeenik

—hamalau lerro doi-doi eta laurogei bat hitz—

molde honetara, ehun berba langan gehienik?

Sarri errandakoa errango dautzut berriz:

mamia mami erdi da ez badator neurriz.