ZUBIA

Erraldoia, edo oinezkoaren pasarela,

beti berdina izanik, beti da berria:

uraren gainetik pasata asez egarria

ohartarazten baitu bestaldea, badela.

Hiriaren eta begiradaren karela,

eta metafora gehiegiren armarria:

zubigileek baietz hondoratu zubia;

bostekoak dio gu ere zubi garela.

Olestu joan-etorriaren bertutea.

Esekian alegerago doa zangoa,

eta ez hain pozik kale trinkoan, ordea.

Zu izanik hemengoa, ni, berriz, hangoa,

bada zerbait zubia bera baino hobea:

zubia zeharkatzeko daukagun gogoa.