EURI FIN HORI

Deus ez da finko: harria ere higatzen da

eta berdin ezpata erabiliz kamustu.

Partituran idatzitako zure apustu

oro, paperetik altxatu arte, herren da.

Bide-orri huts batekin ez zaitezke senda:

entzuleen arteko aingeruak ez ahaztu,

haien belarrien esku baitago garraztu,

desbideratu, edo opatzea beren xenda.

Unea habitatzen duen unearen erpin

ezezagunera —berdin azpimunduraino—,

mementuaren taupadatik, arretaz ekin.

Lanbroa iragazi antzoki barruraino:

oholtzara orduko dena dakigun ezjakin,

euri-zuntzak atzeman ditugu elkarrekin.