AINGURA

Kate luzeko aingurarik ba ote dago?

Badugu non edo non finkatzeko irrika,

zorabiagarri baita etengabeko kinka.

Erantzukizun larregi, artxipelago

honetan dagokigunez itsasoa trago

bakarrarekin hustuta dzangatzea klika,

askatasun berba potoloak aldarrika

plazara agertuz garen baino ziurrago.

Zer da, baina, aingura bariko libertatea?

Jitoan ibiltzea olatuen menpeko?

Naufragoaren ogibidea ikastea?

Gura dudan aingura da orain itsaspeko;

gero, azalera altxatzeko borondatea,

ihes beteenean ardatzik ez galtzeko.